Körfubolti: Sigur strax í fyrsta leik
Höttur hóf keppni í úrvalsdeild karla í körfuknattleik í gærkvöldi með 87-104 sigri á Grindavík á útivelli. Höttur náði snemma leiks tíu stiga forskoti og lét það aldrei af hendi.Það var Deontay Buskey, nýr Bandaríkjamaður í liði Hattar, sem skoraði fyrstu körfu leiksins. Hún var þriggja stiga. Í kjölfarið skoraði Matej Karlovic aðra slíka körfu og staðan orðin 0-6. Eftir þrjár mínútur var hún orðin 2-11.
Höttur lét forustuna aldrei af hendi og aldrei náðu heimamenn í Grindavík að jafna. Höttur hitti vel úr þriggja stiga skotum í byrjun og byggði þannig upp forskotið.
Minnsti munur leiksins var í byrjun annars leikhluta. Grindavík hafði skoraði fjögur síðustu stigin í fyrsta leikhluta og náð muninum niður í 24-29 og skoraði síðan fyrstu körfu annars leikhluta þannig staðan varð 26-29.
Höttur svaraði strax með þremur þriggja stiga körfum og var því aftur komið í um 10 stiga forskot. Um miðjan leikhlutann var forskotið orðið 14 stig, 30-44 en Grindavík lagaði það ögn niður í 40-50 í háflleik.
Grindavík náði rispu í þriðja leikhluta, skoraði 12 stig í röð og lagaði svarta stöðu úr 45-62 í 57-62. Höttur svaraði þá með sjö stigum í röð og var kominn með sitt venjulega forskot á ný, 59-69. Í lok leikhlutans var staðan 66-75.
Kraftur var í Hetti í byrjun fjórða leikhluta þegar liðið komst í 69-85. Grindavík reyndi að draga á forskotið en gekk komst ekki nær en í kringum tíu stigin. Höttur skoraði síðan síðustu sex stigin í leiknum. Úrslitin voru þá ráðin og yngri leikmenn komnir inn á hjá báðum liðum.
Á sama tíma og varast ber að lesa of mikið úr leik Grindavíkur, sem vantaði tvo erlenda leikmenn, þá skipta tvö stig Hött alltaf máli, hvort sem liðið verður í baráttu um að komast í úrslitakeppnina eða forðast fall í lok leiktíðar. Þá ætti það að veita liðinu sjálfstraust að vinna fyrsta leikinn, nokkuð sem liðið hefur ekki áður afrekað í úrvalsdeildinni.
Buskey var stigahæstur með 28 stig, Karlovic skoraði 22 og Gustav Suhr-Jessen 20. Þá er vert að minnast á framlag Nemanja Knezevic sem tók 13 fráköst og skoraði 8 stig.
