Körfubolti: Eysteinn Bjarni valinn í landsliðsúrval
Eysteinn Bjarni Ævarsson, körfuknattleiksmaður frá Egilsstöðum, var í gær valinn í 41 manns úrval fyrir íslenska karlalandsliðið í körfuknattleik sem stefnur á Evrópumótið 2017. Hann átti ekki von á að vera boðaður til æfinga.
„Þetta er frábært tækifæri. Það verður geggjað að fá að spila með þessum leikmönnum og reynsla sem ég á eftir að geta nýtt mér,“ sagði Eysteinn Bjarni í samtali við Austurfrétt.
Hann var staddur á Vík í Mýrdal á leiðinni suður en æfingar hefjast á morgun. Til þeirra voru boðaðir 22 leikmenn sem ekki hafa verið áður í landsliðinu.
Æft verður fram að helgi en þá munu Craig Pedersen landsliðsþjálfari og aðstoðarmenn hans velja hvaða leikmenn halda áfram. Þeir sem standa sig best á æfingunum æfa síðan með landsliðinu sem tók þátt í Evrópumótinu í fyrra og síðan verður endanlegur hópur fyrir forkeppnina valinn.
Undankeppni mótsins verður leikin í ágúst og september. Þann 17. september verður ljóst hvaða lönd komast í lokakeppnina sem haldin verður fyrri hluta september 2017 í Rúmeníu, Finnlandi, Ísrael og Tyrklandi.
Eysteinn segist ekki hafa átt von á þessari upphefð. „Nei, í sannleika sagt þá átti ég ekki von á þessu. Ég fékk bara skilaboð um að Pedersen hefði boðað mig til æfinga.“
Eysteinn Bjarni er 21 árs gamall framherji, uppalinn hjá Hetti og lék með liðinu í úrvalsdeildinni síðasta vetur. Hann skoraði 10 stig að meðaltali í leik auk þess að taka 5,7 fráköst og gefa 3,1 stoðsendingu. Hann spilar með Stjörnunni í úrvalsdeild næsta vetur.
Annar fyrrum leikmaður Hattar er boðaður til landsliðsæfinganna. Það er Austin Magnus Bracey sem spilaði með liðinu í fyrstu deildinni 2013 og 2014 áður en hann skipti yfir í Snæfell þar sem hann er í dag.
