Kristín Salín: Við vorum bara að gera þetta áhorfendavænt

Kristín Salín Þórhallsdóttir, fyrirliði kvennaliðs Þróttar í blaki, fagnaði í gær sínum þriðja Íslandsmeistaratitli eftir 3-2 sigur á HK í æsilegum leik í Neskaupstað. Hún segir hafa verið erfitt að vera inn á fjórðu hrinu þegar allt gekk á afturfótunum hjá Þrótti.

 

„Við vorum algjörlega að gera þetta áhorfendavænt. Það er hundleiðinlegt að koma og horfa á 3-0 leik,“ sagði Kristín í samtali við Austurfrétt eftir leikinn.

Í stöðunni 2-0 virtist Þróttur með unninn leik í höndunum. Næstu tvær voru hins vegar skelfilegar hjá liðinu. „Við spiluðum vel fyrstu tvær hrinurnar en misstum niður móttökuna í næstu tveimur.“

Liðið náði að rífa sig upp og vinna oddahrinuna sannfærandi. „Það er hundleiðinlegt að vera inn á þegar maður er svona langt undir,“ segir Kristín en fjórða hrinan tapaðist með tæplega tuttugu stiga mun.

„Ég fékk að fara aðeins út af og það hjálpaði mér til að núllstilla mig. Við nýttum hléið milli hrina þannig að þeim sem lá eitthvað á brjósti fengu að tala og koma út pirring. Síðan ákváðum við að standa saman sem lið og taka þetta.“

Það gekk upp og þriðji Íslandsmeistaratitill Kristínar kom í hús. „Ég hef tvisvar áður orðið Íslandsmeistari á afmælisdeginum mínum, 16. apríl. Þess titill er því óvenju snemma á ferðinni.“