Kvennalið Þróttar í undanúrslit bikarkeppninnar í blaki

Kvennalið Þróttar Neskaupstað tryggði sér um helgina sæti í undanúrslitum bikarkeppninnar í blaki. Karlaliðið þarf aðra tilraun. Höttur vann sannfærandi útisigur á ÍA í fyrstu deild karla í körfuknattleik.

Fyrirkomulagið í bikarkeppninni er þannig að leikið er í tveimur riðlum. Efstu liðin úr hvorum komast í undanúrslit en hin sem eftir sitja fá annað tækifæri í seinni forkeppninni sem fram fer á Norðfirði fyrstu helgina í febrúar.

Kvennalið Þróttar lék í B riðli með Aftureldingu, Þrótti Reykjavík og KA. Liðið vann alla leiki sína þrjá 2-0 og fór áfram með fullt hús stiga. Karlaliðið spilaði í B riðli við HK og Fylki og tapaði fyrir báðum liðunum. 

Höttur vann ÍA á Akranesi í fyrstu deild karla í körfuknattleik á föstudagskvöld. 73-89. Höttur náði yfirtökunum strax í leiknum, var yfir 10-28 eftir fyrsta fjórðung og 36-44 í hálfleik.

ÍA byrjaði vel í seinni hálfleik og komst yfir, 45-44. Hattarmenn svöruðu með frábærum seinni hluta þriðja fjórðungs og voru 51-70 yfir að honum loknum. Sú forusta hélst til loka.

Frisco Sandidge var atkvæðamestur Hattarmanna með 27 stig og 12 fráköst. Liðið leikur sinn næsta leik gegn Val á fimmtudagskvöldið klukkan 18:30.