Þróttur bikarmeistari eftir einn rosalegasta blakleik Íslandssögunnar
Þróttur Neskaupstað varð í dag bikarmeistari kvenna í blaki eftir 3-2
sigur á HK í úrslitaleik í Laugadalshöll. Þróttur vann fyrstu tvær
hrinurnar en gaf eftir og þurfti að hafa fyrir sigrinum í æsilegri
oddahrinu.
Þróttur spilaði mjög vel í fyrstu tveimur hrinunum, sérstaklega í vörn. Hávörnin virkaði vel og bakverðirnir tóku við því sem datt niður á bakvið. Eftir að staðan var 16-16 í fyrstu hrinu breyttu Norðfirðingar stöðunni í 17-20. HK tók leikhlé , jafnaði í 20-20 og komst síðan yfir 22-21. Þróttarar unnu hrinuna með að skora seinustu fjögur stigin í henni.
Þróttur stakk af í upphafi annarrar hrinu og komst í 1-6 áður en HK tók leikhlé. Það dugði lítið fyrr en eftir fyrra tæknihlé hrinunnar í stöðunni 2-8. Þá vaknaði Kópavogshliðið og minnkaði muninn í 7-8 áður en Þróttur tók leikhlé. Þróttur náði forskoti sínu aftur í 11-16 en HK-ingar minnkuðu muninn í eitt stig, 18-19 eftir langa sókn. Þróttur jók forustuna á ný í 18-22 áður en HK tók leikhlé. Kópavogsliðið jafnaði í 25-24 og komst síðan yfir, 25-24. Á þessum lokaköflum byggðust sóknir Þróttar upp á að koma boltanum út á kantinn til Miglenu Apostolovu til að hún gæti smassað. Það gekk upp því Norðfjarðarliðið vann hrinuna með að skora þrjú seinustu stigin.
Oft vill það verða svo í blakleikjum að þegar annað liðið hefur unnið fyrstu tvær hrinurnar slakar það á þannig að hitt liðið svarar fyrir sig. Í þriðju hrinu virkaði Þróttarliðið hálf sofandi. Ákefðin og einbeitingin sem var til staðar í vörninni hvarf og HK skoraði auðveld stig, til dæmis beint úr uppgjöfum. Kópavogsliðið komst í 8-3 en Þróttur jafnaði í 10-10. Aftur tók HK forustuna og komst í 19-14 en Þróttur minnkaði skoraði þá þrjú stig í röð. HK sýndi magnaða vörn í stöðunni 21-17 með að elta boltann lengst til hliðar út fyrir völlinn. Það dugði samt ekki langt því þegar boltinn kom næst yfir netið endaði hann í gólfinu. Það var samt seinasta stig Þróttar í hrinunni sem HK vann 25-18.
HK náði strax forustunni 8-2 í upphafi fjórðu hrinu. Eftir að munurinn var kominn í tíu stig, 16-6, fór Apostolov Apostolov, þjálfari Þróttar, að undirbúa oddahrinuna. Lykilmönnum, sem voru teknir að þreytast var skipt út af og yngri leikmennirnir fengu að spreyta sig. HK vann hrinuna örugglega 25-12.
Í oddahrinum þarf aðeins að skora 15 stig til að vinna en munurinn þarf að vera tvö stig. Þróttur skoraði fyrstu tvö stigin en HK svaraði fyrir sig og liðin skiptust á forustunni. HK komst í 8-6 en Þróttur jafnaði í 8-8. Aftur komst HK tveimur stigum yfir, 10-8 en Þróttur svaraði með fimm stigum í röð. Þá virtist bikarinn stefna austur á Norðfjörð en HK jafnaði. Í hönd fór æsilegur endasprettur þar sem forustan sveiflaðist á milli liðanna. Bæði fengu færi á að gera út um leikinn en mistókst. Til að mynda enduðu tvö kantsmöss Helenar Kristínar Gunnarsdóttur, sem annars átti góðan leik, í netinu. Sem fyrr í þessari stöðu leitaði Þróttarliðið að Miglenu, sem reyndist vel en annar reynslubolti, Unnur Ása Atladóttir, skilaði líka sínu á þessum kafla. Eftir mikla baráttu tókst Þróttarstelpum að smassa boltanum í gólf HK og tryggja sér 17-19 sigur í hrinunni.
Leikurinn tók um tvo tíma. Honum voru ætlaðar 90 mínútur í dagskrá og átti úrslitaleikur karla að hefjast 15:00 en sá hófst ekki fyrr en rúmlega 16:00.
