Þrír ungir blakarar hlutu afreksstyrki
Þrír ungir íþróttamenn úr Þrótti Neskaupstað hlutu styrki úr Afrekssjóði Guðmundar Bjarnasonar á dögunum, en þetta er í fyrsta skipti sem úthlutað er úr sjóðnum.
Sjóðurinn var stofnaður í minningu Guðmundar Bjarnasonar á síðasta ári og er tilgangur hans að styrkja einstaklinga innan Þróttar sem náð hafa framúrskarandi árangri í íþrótt sinni.
Þrír íþróttamenn sóttu um styrk úr sjóðnum fyrir fyrstu úthlutun, en til þess að geta það verður viðkomandi að hafa öðlast rétt til keppni á fjölþjóðlegum mótum, verið valinn í landslið, unnið Íslandsmeistaratitil, sett Íslandsmet eða skarað fram úr með eftirtektarverðum hætti.
Styrkþegarnir eru þau María Rún Karlsdóttir, Særún Birta Eiríksdóttir og Þórarinn Örn Jónsson. Leggja þau öll stund á blak og hafa náð mjög góðum árangri í íþróttinni – Maria Rún hefur leikið með A-landsliði Íslands að undanförnu en þau Særún Birta og Þórarinn með unglingalandsliðum.
Næst verður úthlutað seint á þessu ári.
Frá vinstri: María Rún Karlsdóttir, Særún Birta Eiríksdóttir og Þórarinn Örn Jónsson. Ljósm. Smári Geirsson
