Viðar hættur með Hött/Huginn
Viðar Jónsson hefur látið af störfum sem þjálfari liðs Hattar/Hugins í þriðju deild karla í knattspyrnu. Viðar mun ekki stýra liðinu síðustu tvo leikina í Íslandsmótinu ef þeir verða spilaðir.Félagið tilkynnti í kvöld að stjórn þess og Viðar hefðu komist að samkomulag um þetta. Þar kemur fram að í samningi Viðars hafi verið uppsagnarákvæði í október hvert ár sem báðir aðilar hafi ákveðið að rétt væri að nýta.
Stjórnin þakkar Viðar fyrir samstarfið og óskar honum velfarnaðar í framtíðinni. „Ákvörðunin er ekki léttvæg enda Viðar drengur góður og flottur þjálfari.“
Viðar tók við þjálfun í kjölfar þess að Höttur og Huginn ákváðu að sameina lið sín haustið 2018. Undir hans forustu varð liðið í sjötta sæti þriðju deildar í fyrra.
Það er nú í tíunda sæti, tveimur stigum frá liðunum í fallsætunum. Annað þeirra á hins vegar leik til góða. Stjórn Knattspyrnusambands Íslands hefur ákveðið að lokið verði við leik á Íslandsmótinu verði æfingar og keppni leyfðar eftir 3. nóvember.
Verði keppni hætt áður heldur Höttur/Huginn sæti sínu. Stjórn liðsins ákvað í síðustu viku að halda ekki erlendum leikmönnum liðsins lengur vegna fjárhagsörðugleika.
Samkvæmt leikjadagskrá á Höttur/Huginn heimaleik gegn Sindra 7. nóvember og útileik gegn Ægi 14. nóvember. Þær upplýsingar fengust hjá Hetti/Huginn í kvöld að ekki væri ráðið hver myndi stýra liðinu í þeim leikjum en verið væri að skoða möguleikana og málið skýrist á næstu dögum.
