AFL átelur stjórnvöld vegna breytinga á skattaumhverfi sjómanna
Í gærkvöld samþykkti aðalfundur AFLs Starfsgreinafélags ályktun um breytingar á skattamálum sjómanna: „Aðalfundur sjómannadeildar AFLs Starfsgreinafélags átelur stjórnvöld fyrir lagabreytingar á skattaumhverfi sjómanna án þess að tekið sé tillit til sögu sjómannaafsláttarins. Krafa fundarins er að lögin verði afturkölluð eða að sjómenn fái í hans stað dagpeninga líkt og aðrar stéttir sem stunda vinnu fjarri heimili og skorar fundurinn á útvegsmenn að standa með sjómönnum í þessum efnum. ...
Fundurinn minnir jafnframt á að sjómenn þurfa einir stétta að greiða fyrir eldsneyti á sínum vinnustað með þátttöku í olíukostnaði útgerðar.“
Á fundinum voru kjörnir í stjórn deildarinnar:
Formaður: Grétar Ólafsson
Varaformaður: Stephen R. Johnson
Meðstjórnendur: Jón. B. Kárason, Ólafur Logi Árnason, Grétar Smári Sigursteinsson
Varamenn í stjórn: Sigurd Jón Jacobsen, Þorsteinn J. Þorsteinsson, Unnsteinn R. Kárason.
