Vegfarendur sýni aðgát og leiti upplýsinga um færð
Vegna hvassviðris og élja má víða búast við slæmu ferðaveðri á austanverðu landinu fram eftir degi. Búist er við mjög hvössum vindhviðum í Öræfum. Víða um suðaustur- og austurströndinni er ekkert ferðaveður og eru vegfarendur beðnir um að leyta sér upplýsingar um færð og veður áður en lagt er á stað. Austanlands er þæfingur á Fjarðarheiði, mokstur stendur yfir. Hálkublettir, snjóþekja og skafrenningur á öðrum leiðum þó er þungfært og stórhríð er á Breiðdalsheiði. Ófært og óveður er á Öxi. Hellisheiði eystri er lokuð.
Viðvörun: Búist er við stormi suðaustanlands fram eftir degi. Spá: Norðan 10-18 m/s, en 15-23 m/s á Suðausturlandi fram eftir degi og snarpar vindhviður. Snjókoma á norðaustanverðu landinu, stöku él á Norðvesturlandi, en annars léttskýjað að mestu. Dregur úr vindi og ofankomu með kvöldinu. Norðan 8-15 í kvöld og á morgun og dálítil él norðantil. Frost 2 til 9 stig.
Mjög hvasst var á Austurlandi í gær. Björgunarsveitin Geisli á Fáskrúðsfirði var kölluð út um hádegið þegar þak fauk í heilu lagi af garðhúsi og Björgunarsveitin Ísólfur á Seyðisfirði þurfti að aðstoða um svipað leyti þar sem þakskyggni og þak og á íbúðarhúsi var við það að losna. Rúða brotnaði í húsi á Seyðisfirði vegna óveðursins. Þegar leið á daginn var Hjálparsveit skáta í Möðrudal kölluð út til að hjálpa fólki á þeim slóðum, en bifreið fólksins var þá farin að hökta vegna kulda og fannfergis. Rúður brotnuðu í bílum á ferð á suðausturlandi í gær.
