Bíll brann á Seyðisfirði í nótt: Áminning um að við þurfum að bjarga okkur sjálf
Slökkvilið Múlaþings á Seyðisfirði barðist í nótt við eld sem kom upp í bíl á ferli í bænum. Slökkviliðsmenn áttu í vandræðum með að komast á slökkvistöðina. Varðstjóri segir mildi að bruninn hafi ekki verið stærri því ekki var hægt að fá aðstoð annars staðar að.Það var um klukkan þrjú í nótt sem slökkvilið fékk tilkynningu um brennandi bíl á Seyðisfirði. Elvar Snær Kristjánsson bjó rétt hjá og var fyrstur á staðinn með slökkvitæki en aðrir slökkviliðsmenn áttu erfiðra um vik.
„Þeir áttu sumir í vandræðum að komast heiman frá sér á slökkvistöðina til að ná í bílinn okkar. Einn fór til dæmis á gönguskíðum. Bíllinn sjálfur var nógu stór og öflugur til að komast í gegnum snjóinn.
Aðstæður voru erfiðar út af snjónum, mittisdjúpur snjór í kringum bílinn og brunahanar á kafi. En verðrið vann líka með okkur því það var lygnt og snjórinn blautur þannig hann átti sinn í að kæfa eldinn.“
Sjaldnast er mikið hægt að gera þegar kviknar í bifreiðum, sama hvar þær eru, annað en verja það sem í kringum er. Í stærri eldsvoðum fær slökkviliðið á Seyðisfirði aðstoð frá Egilsstöðum en erfitt hefði verið að senda hana yfir Fjarðarheiðina sem var kolófær í nótt.
„Þetta minnir á hvað við erum einangruð hér. Við annars konar aðstæður eða stærri bruna hefðum við þurft aðstoð frá Héraði. Það hefði verið erfitt og jafnvel ómögulegt í nótt. Það hefði að minnsta kosti tekið langan tíma að ryðja fyrir slökkvibílanna. Atburðir eins og þessir minna á að við verðum að bjarga okkur sjálf á meðan ekki eru komin göng,“ segir Elvar Snær.
Bíllinn er ónýtur eftir eldsvoðann en ökumanni hans varð ekki meint af. Líklegast virðist að bíllinn hafi ofhitnað í miklum snjó sem var á götum Seyðisfjarðar í nótt.
Varðskipið Freyja kom til Seyðisfjarðar snemma í morgun og er þar til taks ef á þarf að halda.
Frá brunaútkalli á Seyðisfirði. Mynd úr safni.
