Norðfjarðargöng lokuð vegna grjóthruns
Norðfjarðargöngum var lokað eftir hádegi í dag þar sem grjót hrundi úr lofti ganganna. Ekki er ljóst hvenær hægt verður að opna þau á ný.Að sögn Sveins Sveinssonar, umdæmisstjóra Vegagerðarinnar á Austurlandi, er verið að meta aðstæður í samáði við jarðfræðinga stofnunarinnar.
Dálítið stykki hrundi úr loftinu í miðjum göngunum upp úr hádegi í dag. Sveinn segir setlag úr lausu setlagi hafa farið af stað og komið niður. Sambland er af steinsteypu og bergi. „Þetta getur því miður gerst en sem betur fer varð ekkert slys.“
Ekkert hefur verið ákveðið um viðbrögð á þessu stigi, til dæmis hvort mögulega sé hægt að hleypa umferð á göngin undir eftirliti.
Vegna hrunsins falla ferðir almenningssamgangna til og frá Norðfirði niður í dag. Staðan verður endurmetin í fyrramálið.
