Ný gul viðvörun um hádegi á sunnudag
Fréttir • This email address is being protected from spambots. You need JavaScript enabled to view it. • Fyrst birt 18. jan 2025 17:57 • Uppfært 18. jan 2025 17:57
Önnur gula viðvörunin sem gefin hefur verið út fyrir þessa helgi gengur í gildi um hádegi á morgun og stendur fram eftir mánudegi.
Viðvaranir eru gefnar út fyrir annars vegar Austurland að Glettingi, hins vegar Austfirði, vegna norðaustan hríðar. Von er á að hún standi skemur á Austurlandi.
Þar tekur hún gildi klukkan 14:00 á morgun, sunnudag og gildir í sléttan sólarhring. Á þeim tíma er spáð norðaustan 15-23 m/s með snjókomu og skafrenningi sem viðbúið er að spilli færi, einkum á fjallvegum. Eftir þann tíma gengur veðrið niður.
Á Austfjörðum er spáð 13-20 m/s og mikilli snjókomu. Til viðbótar við versnandi akstursskilyrði er varað við aukinni hættu á snjóflóðum. Fólk er því hvatt til að sýna aðgát og fylgjast með veðurspám.
Í yfirliti ofanflóðadeildar Veðurstofunnar frá í gær segir að ekki sé talin hætta á flóðum í byggð en til fjalla geti skapast varasamar aðstæður. Veginum yfir Fagradal var lokað síðustu nótt vegna snjóflóðahættu en opnaður snemma í morgun.
