Fljótsdalshérað kallar til varamann fyrir Útsvar: Ég bara tróð mér í þetta
Stefán Bogi Sveinsson tekur sæti Sveins Birkis Björnssonar í Útsvarsliði Fljótsdalshéraðs þegar liðið mætir Kópavogi í átta liða úrslitum keppninnar í kvöld. Sveinn Birkir þurfti að vera á tveimur stöðum í einu og því stökk reynsluboltinn til.„Það bað mig enginn um að koma, ég bara tróð mér í þetta," segir Stefán Bogi sem keppti um árabil í Útsvarinu en hann var í liðinu sem tapaði fyrir Grindavík í úrslitum árið 2012.
Sveinn Birkir, sem verið hefur í liðinu í vetur eftir að hafa keppt sem varamaður í fyrravetur, er einnig þjálfari Álftaness í annarri deild karla í körfuknattleik en margir Austfirðingar hafa spilað með liðinu. Liðið leikur í kvöld hreinan úrslitaleik gegn Íþróttafélagi Breiðholts um laust sæti í fyrstu deild í haust.
„Hann lenti í erfiðu vali og ákvað að vera með sínum lærisveinum í körfunni. Ég reyni að fylla skarð hans," segir Stefán Bogi sem verið hefur tengilliður sveitarfélagsins vegna keppnina.
Í liðinu eru eftir sem áður Þórður Mar Þorsteinsson og Hrafnkatla Eiríksdóttir. Stefán og Þórður hafa áður keppt saman í spurningakeppnum en þeir voru báðir í liði Menntaskólans á Egilsstöðum sem keppti í Gettu betur fyrir tæpum tuttugu árum.
Keppnin í kvöld hefst klukkan 20:05 og verður í beinni útsendingu í Sjónvarpinu.
