Þrír klassískir Austfirðingar frumflytja verk eftir austfirsk tónskáld
Gítarleikarinn Svanur Vilbergsson, flautuleikarinn Hildur Þórðardóttir og mezzósópransöngkonan Erla Dóra Vogler halda tónleika á þremur stöðum á Austurlandi í næstu viku sem Þrír klassískir Austfirðingar. Þau frumflytja meðal annars verk eftir austfirsk tónskáld.Erla, Hildur og Svanur eru öll alin upp á Austurlandi, hvert í sínu bæjarfélaginu: Svanur á Stöðvarfirði, Erla á Egilsstöðum og Hildur í Neskaupstað. Þau hófu þar tónlistarnám sitt en hafa síðan farið erlendis í framhaldsnám.
Efnisskrá tónleikanna verður mjög blönduð að þessu sinni en hápunktur þeirra verður þó frumflutningur tveggja tónverka eftir ung austfirsk tónskáld. Það eru verkin „Fimm týndir jólasveinar," eftir Báru Sigurjónsdóttur frá Egilsstöðum, og „Bara nokkrir tónar," eftir Pál Ívan frá Eiðum.
Tónleikarnir verða haldnir í Sláturhúsinu á Egilsstöðum á mánudag, Frönsku kapellunni á Fáskrúðsfirði á þriðjudag og safnaðarheimilinu í Neskaupstað á miðvikudag. Allir tónleikarnir hefjast kl. 20:00 og eru um klukkustund að lengd.
Svanur, Erla Dóra og Hildur að loknum tónleikum í fyrra. Mynd: Úr einkasafni
