Jólastemning á jólamarkaði Dalahallarinnar - myndir
Hin árlegi jólamarkaður Dalahallarinnar á Neskaupstað fór fram í allri sinni dýrð á laugardaginn var. En það er hestamannafélagið Blær sem á reiðhöllina. Markaðurinn er haldinn ár hvert í byrjun aðventu í fjáröflunarskyni fyrir Dalahöllina. „Þetta heppnaðist rosalega vel í ár og stemningin var æðisleg. Það fylltust 30 söluborð af allskonar góðgæti og fjölbreyttu handverki, og að sjálfsögðu vorum við með veglegt kaffihlaðborð,“ segir Sigrún Júlía Geirsdóttir, formaður Hestamannafélagsins.
Mæting á markaðinn var góð enda vegleg dagskrá í boði fyrir gesti og gangandi. „ það tala margir um það að akkúrat þessi markaður marki upphafið að aðventunni fyrir þá, þess vegna er það fastur liður hjá mörgum að koma ár eftir ár. Þetta er líka rosalega gaman. Fyrir utan stemninguna við söluborðin, buðum við upp á barnabíó, og sátu krakkarnir á heysátum og borðuðu popp og drukku Svala. Sönghópurinn Fönn söng ásamt fleirum sem tóku lagið. Það var bara fullt af fólki sem var bara svo glatt í sinni, og það ríkti bara æðisleg jólastemning,“ segir Sigrún að lokum.
Myndir: Kristín Hávarðsdóttir
