Tvennir minningartónleikar um Ágúst Ármann í Egilsbúð
Laugardaginn 13. júní verða haldnir tvennir minningartónleikar um Ágúst Ármann Þorláksson í Hótel Egilsbúð. Fyrri tónleikarnir verða kl. 16:00 og þeir seinni kl. 20:00. Tónleikarnir verða um leið útgáfutónleikar á plötu með lögum eftir Ágúst Ármann.Fjölskylda Ágústar stendur að tónleikunum. Fram kemur stórhljómsveit skipuð fyrrverandi nemendum hans, samstarfsmönnum og vinum auk valinkunnra söngvara. Einnig verður kórsöngur og í heildina koma rúmlega þrjátíu manns fram á sviðinu í Egilsbúð á laugardag.
„Þetta leggst bara vel í okkur. Það eru búnar að vera stífar æfingar síðustu daga og svo er generalprufa á morgun,“ sagði Bjarni, sonur Ágústs, í samtali við Austurfrétt í dag, en hann hafði þá nýlokið æfingu ásamt stórhljómsveitinni sem kemur fram á tónleikunum.
„Við ákváðum að heiðra minningu hans með þessu verkefni. Erum búnir að vera að taka upp plötu með lögum hans í vetur, sem nefnist Sól í heiði og ætlum að byrja að selja hana á tónleikunum á laugardag,“ sagði Bjarni, en platan fer svo í almenna sölu eftir helgi.
Fyrir þá sem ekki vita var Ágúst áratugum saman einn helsti forystumaður austfirsks tónlistarlífs og í hans huga voru engin landamæri í tónlistarheiminum. Fyrir utan að stjórna kirkjukórum sinnti hann margvíslegum störfum fyrir Kór Fjarðabyggðar og átti mikinn þátt í að byggja upp Snælandskórinn, kór Kirkjukórasambands Austurlands, sem stjórnarmaður og formaður í Kirkjukórasambandinu.
Auk þess lék Ágúst í fjölda danshljómsveita og var einnig einn af stofnendum Blús-, rokk- og djassklúbbsins á Nesi (Brján). Ágúst hlaut menningarverðlaun Sambands sveitarfélaga á Austurlandi árið 2007.
Allur ágóði af tónleikunum og sölu plötunnar mun renna í minningarsjóð sem verður stofnaður í minningu Ágústar Ármanns en sá sjóður mun meðal annars hafa það hlutverk að styrkja ungt tónlistarfólk á svæðinu.
Miðasala fer fram á heimasíðunni tix.is en einnig verður hægt að kaupa miða við hurðina.
