Skyndiskríll á flugvellinum á Egilsstöðum: Myndband
Stúlknakór Egilsstaðakirkju, Liljurnar, tróðu óvænt upp á flugvellinum á Egilsstöðum þar sem farþegar biðu eftir töskum sínum og tóku lagið.„Ef farþegarnir eru að bíða á annað borð, hvers vegna ekki að veita þeim smá óvænta afþreyingu til að lífga upp á daginn,“ segir Margrét Lára Þórarinsdóttir, stjórnandi kórsins.
Uppákoman kallast á ensku „FlashMob“ sem við kjósum að þýða sem „skyndiskríl.“ Það er gjörningur hóps eftir handriti. Hópurinn byrjar tvístraður og safnast síðan saman.
Þannig fóru stúlkurnar í kórnum að. Þær byrjuðu hver í sínu horninu að syngja „Lean On Me“, lag bandaríska söngvaskáldsins Bill Withers, og söfnuðust síðan saman við færibandið.
Þetta er í fyrsta skipti sem kórinn ræðst í svona gjörning. Margrét Lára segir hópinn hafa lært ýmislegt af uppákomunni á föstudaginn.
„Við munum láta aftur til skara skríða áður en langt um líður, gef þó ekkert upp um staðsetninguna!“
Hún segir að farþegarnir á flugvellinum hafi haft gaman af uppákomunni. „Ég gat ekki betur séð og heyrt en að farþegarnir virtust hafa gaman af Við höfðum alla veganna gaman af þessu!“
