Sundlaug Norðfjarðar 70 ára
Norðfirðingar fagna því á sunnudag að 70 ár eru liðin frá því að sundlaugin í Neskaupstað var tekin formlega í notkun. Vígslan fór fram 8. ágúst árið 1943 og er Sundlaug Norðfjarðar því með elstu mannvirkjum á Austurlandi. Bylting síns tíma
Sundlaugarbyggingin var risavaxið verkefni og með sameiginlegu átaki tókst að fjármagna framkvæmdirnar með framlögum frá einstaklingum, félögum og nærliggjandi hreppum, auk þess sem bæjarfélagið fékk myndarlegan styrk úr íþróttasjóði ríkisins.
Í heild sinni er talið að mannvirkið hafi kostað um 200 þúsund krónur, sem voru verulegir fjármunir á þeim tímum sem fjárlög íslenska ríkisins voru talin í tugum milljóna.
Heitt vatn var enn fremur munaður sem fáir gátu veitt sér í einhverjum mæli og má geta nærri um þá byltingu sem almenningssundlaug stóð þá fyrir, varðandi bæði aðstöðu til hreinlætis og ekki síður sundkennslu, sem var mikilvæg útvegsbæjum á borð við Neskaupstað.
Fírað upp með reykpústi
Upphaflega var kælivatni af vélum rafstöðvarinnar í Neskaupstað leitt í laugina og var hiti vatnsins aukinn með „reykpústinu“ úr vélum rafstöðvarinnar. Gaf sú aðferð góða raun.
Margs er að minnast úr langri rekstrarsögu sundlaugarinnar. Þann 24. Nóvember 1949 féll mikið aurflóð úr fjallinu ofan við bæinn og fyllti bæði laugarkerið og sundlaugarhúsið. Komu fjölmargir að hreinsunarstörfum, m.a. nemendur úr efstu bekkjum grunnskólans. Á árinu 1989 mokuðu síðan norðfirskir blakspilarar á annað þúsund m3 af snjó af bökkum sundlaugarinnar og úr laugarkerinu.
Þá hefur Sundlaug Norðfjarðar hýst fjölmörg sundmót og má þar nefna Sundmeistaramóti Íslands, sem Þróttur Neskaupstað hafði veg og vanda af f.h. UÍA árið 1966.
Ómissandi hluti af mannlífinu
Sundlaug Norðfjarðar hefur frá upphafi verið ómissandi hluti af mannlífinu í Neskaupstað og enn gegnir hún lykilhlutverki á hátíðar- og tyllidögum, s.s. á sjómanna- og þjóðhátíðardaginn. Árið 2006 var þjónustuaðstaða sundlaugarinnar færð til nútímahorfs, með bættri búningsaðstöðu, líkamsræktarstöð og rúmgóðri afgreiðslu. Utandyra bættist annar heitur pottur við ásamt stórum rennibrautum, sem þykja ómissandi viðbót fyrir sundlaugargesti á öllum aldri.
Tímamótanna verður minnst á sunnudag með ýmsu móti. Gefið verður frítt í sund og kl. 15 hefst afmæliskaffi í anddyri sundlaugarinnar.
