Aðventa Gunnars lesin um helgina
Saga Gunnars Gunnarssonar um eftirleitir Fjalla-Bensa og förunauta hans á Mývatnsöræfum verður að venju lesin í Gunnarshúsum í Reykjavík og á Skriðuklaustri 12. desember, annan sunnudag í aðventu.Hjá Rithöfundasambandi Íslands, í Gunnarshúsi á Dyngjuvegi 8, les Jóhanna Friðrika Sæmundsdóttir, leikkona og handritshöfundur. Hjá Gunnarsstofnun á Skriðuklaustri les heimamaðurinn Þór Ragnarsson áhugaleikari. Lesturinn hefst á báðum stöðum kl. 13.30.
Allir eru boðnir velkomnir á þessa viðburði að viðhöfðum hefðbundnum sóttvörnum en þeir sem ekki komast geta notið þeirra í streymi sem finna má gegnum Facebook viðburði staðanna.
Frá árinu 2005 hefur Gunnarsstofnun staðið fyrir upplestri á Aðventu Gunnars Gunnarssonar og unnið að því að breiða þá hefð út, m.a. til Berlínar og Moskvu. Sagan er lesin á æ fleiri stöðum fyrir jólin hérlendis og erlendis þó að á síðasta ári hafi lesturinn fyrst og fremst farið fram í streymi. Þá hlýddu t.a.m. mörg þúsund manns á Ólaf Darra Ólafsson lesa söguna við arineld á Dyngjuveginum.
Gunnar Gunnarsson skrifaði nóvelluna Aðventu árið 1936 og kom hún út í fyrsta sinn það ár í Þýskalandi. Síðan þá hefur sagan um Benedikt, Eitil og Leó verið lesin víða um heim af milljónum manna, ekki síst í desember.
Aðventa er það verk Gunnars sem þýtt hefur verið á flest tungumál og selst í stærstum upplögum. Hún kemur reglulega út í Þýskalandi hjá Reclam forlaginu en hefur náð flugi víðar. Árið 2016 kom hún t.a.m. út á ítölsku og hefur selst þar í yfir 20 þúsund eintökum. Næsta tungumál sem til stendur að þýða Aðventu á er hebreska.
