Atli Pálmar blómstraði bæði í bílasmíði og bílamálun í Borgarholtsskóla
„Já, ég læt þetta duga í bili og fer svona hvað úr hverju að halda austur á ný og býst við að fara beint að vinna í kjölfarið,“ segir Atli Pálmar Snorrason, sem lauk fyrir nokkru námi í bílamálun og kláraði nýverið nám í bílasmíði í þokkabót við Borgarholtsskóla.
Atli Pálmar, sem er frá Egilsstöðum, lét ekki nægja að leggja bara stund á bílafræðin í höfuðborginni heldur lauk báðum greinum með sérstakar viðurkenningar frá skólanum fyrir framúrskarandi námsárangur.
„Ég er nú líklega með bíladellu í blóðinu. Pabbi er í þessu og allnokkrir aðrir í ættinni þannig að það er líklega ekki langt að sækja áhugann. Námið sjálft fannst mér auðvelt en það er líklega vegna þess að ég hef mikinn áhuga á flestu sem viðkemur bílum og þegar maður hefur mikinn áhuga þá er allt auðveldara.“
Hann er að flytja búferlum austur á Hérað og er ekki í vafa um að þar vill hann búa í framtíðinni.
„Mig hlakkar til að koma aftur austur. Höfuðborgin er allt í lagi þannig en það er margt hérna sem fer í taugarnar á mér eins og umferðin sem er hlutur sem maður þarf ekkert að hugsa um fyrir austan.“
Atli stoltur með viðurkenningar fyrir góðan árangur. Hann flytur austur á land í lok þessa mánaðar og lífið tekur við. Mynd úr einkasafni
