Aprílgabb: Austfirðingur kemur í fyrsta sinn fram með erótískan dans á konukvöldi
Austfirðingur sem leggur stund á erótískan dans hyggst í fyrsta sinn fyrir sjónir almennings á konukvöldi sem haldið verður á Reyðarfirði í kvöld. Dansarinn leggur áherslu á að ekki sé um að ræða hefðbundinn nektardans þar sem áherslan sé að losa um kynferðislega óra áhorfenda.
„Dansinn byggir á gamalli austurlenskri hefð. Fyrst og fremst er þetta þetta listrænn dans þótt nektin sé mikilvægur hluti af tjáningunni,“ segir dansarinn sem vill ekki láta nafn síns getið. „Þetta snýst um að virkja og viðhalda kynferðislegri spennu. Ekki ólíkt því sem gerist í hugmyndafræði Tantra.“
Dansarinn hefur ekki komið fram áður en hefur síðustu misseri stundað fjarnám og æft sig heima hjá sér fyrir luktum gluggatjöldum. „Ég hef verið í sambandi við indverskan gúrú sem hefur leiðbeint mér til að finna tilfinningum mínum rétta leið í gegnum tjáningarformið.“
En hvers vegna skyldi karlmaður á besta aldri hafa snúið sér að nektardansi. „Ég vinn í álverinu og það er fremur einhæf vinna. Dansinn er góð leið til að fá útrás fyrir hreyfiþörf og ekki síður tilfinningar eftir langa vakt.
Við erum fyrst við sjálf þegar við höfum kastað af okkur hamnum með því að klæða okkur úr þeim leikbúningi sem við förum í dags daglega sem eru fötin okkar. Líkami okkar endurspeglar í raun hver við erum.“
Maðurinn vonast til að geta þróað danslist sína enn frekar. Hann segist sjá tækifæri í vaxandi fjölda ferðamanna.
„Það er alltaf draumurinn að geta gert áhugamálið að atvinnu. Dansatriði eins og þetta kunna að verða vinsæl skemmtun á ráðstefnum, veislum eða hvataferðum,“ segir hann og bendir á að vinsælt sé meðal miðaldra breskra kvenna að halda partý með „strandarstrákum“ á Jamæka. „Ég sé fyrir mér að íslenskir víkingar yrðu fullt eins vinsælir.“
Dansarinn sótti um styrk til að þróa og markaðssetja vöru sína frekar í Uppbyggingarsjóð Austurlands fyrr í vetur en fékk neitun. Hann var ekki sáttur við það. „Hér hefði verið um að ræða nýja afurð sem laðað hefði að alveg nýjan markhóp til svæðisins, jafnvel á tímum þar sem aðrir ferðamenn eru ekki á svæðinu.
En teprurnar í sjóðsstjórninni virðast alveg hafa lokað augunum fyrir þessum möguleikum. Þar virðist helst að viðurkenndar listgreinar hvítu vestrænu elítunnar sé uppi á borðum.“
Konukvöldið verður á Hótel Austur í kvöld. Dansinn verður í koníaksstofu hótelsins en ekki aðalsalnum, meðal annars þar sem um forsýningu er að ræða.
Plássið í stofunni er hins vegar takmarkað og því verða áhugasamar að tryggja sér miða sem fyrst. Tíu miðar eru í boði og verða á boðstólunum á Hárstofu Sigríðar fram að lokum eða á meðan birgðir endast.
