Ekki sérleyfi á Drekanum
Orkustofnun veitir ekki sérleyfi á þessu ári til rannsókna og vinnslu kolvetnis á Drekasvæðinu. Ástæðan er að Sagex Petroleum og Lindir Exploration hafa dregið umsókn um sérleyfi til rannsókna og vinnslu kolvetnis á svæðinu til baka. Áður hafði Aker Exploration gert slíkt hið sama. Stefna um framhaldið verður mótuð á næstunni af stjórnvöldum.
Kristinn Einarsson yfirverkefnisstjóri auðlindamála hjá Orkustofnun, segir að nú þurfi að endurmeta málið í samráði við iðnaðarráðuneytið. Mögulegt gæti verið að hafa opið fyrir umsóknir í ákveðinn tíma á grundvelli fyrsta útboðsins.
Þau olíuleitarfyrirtæki sem sýndu áhuga á útboðinu en sóttu ekki um sérleyfi, báru fyrir sig erfitt efnahagsástand á útboðstímabilinu með tilheyrandi skorti á nýju fjármagni og mikla áhætta sem fylgdi því að hefja rannsóknir á nýju svæði eins og Drekasvæðinu.
Aðalbjörn Björnsson, oddviti Vopnafjarðarhrepps, lætur hafa eftir sér að þetta séu vonbrigði en þurfi þó ekki að þýða endalok verkefnisins.
-
Mynd/Langanesbyggð.is
