Fór heim með fullan spilastokk af nafnspjöldum

Kristján Krossdal, sem framleiðir byssuskefti undir nafni Krossdal Gunstock, varð nýverið fyrsti íslenski framleiðandinn til að sýna vöru sína á einni stærstu skotvopnasýningu heims. Kristján er ánægður með hvernig til tókst á sýningunni og segir mikinn áhuga á afurðum fyrirtækisins.

„Viðbrögðin fóru fram úr mínum björtustu vonum. Það lá við að maður kiknaði í hnjánum þegar stóru strákarnir komu að skoða og kvöddu með orðunum: „It‘s beautiful,““ segir Kristján um ferðina í nýjasta tölublaði Austurgluggans.

Sýningin heitir IWA & OutdoorClassics og er haldin í Nürnberg í Þýskalandi ár hvert. Sýningin stendur í fjóra daga og er haldin í 11 höllum á 110 þúsund fermetrum.

Kristján hefur í á þriðja ár hannað eigin byssuskefti og meðal annars sigrað í frumkvöðlakeppnum sem haldnar hafa verið á Austurlandi. Hann byrjaði í bílskúrnum heima hjá sér en fyrir rúmu ári var ljóst að hann væri ekki nógu stór og flutti Kristján sig þá yfir í Fellabæ. Það var meðal annars til að koma fyrir stórum tölvustýrðum CNC-fræsara sem sérpantaður var frá Bandaríkjunum.

„Hann kom í júní í fyrra. Fyrir þann tíma var ég búinn að smíða 2-3 frumgerðir en þær eru orðnar 15-20 eftir að fræsarinn kom. Þróunin hefur því verið mest síðustu 8-10 mánuði.

Mig hefur alltaf langað í ákveðna gerð af skeftum en þau hafa ekki verið fáanleg með þeim eiginleikum sem ég vildi. Ég byrjaði á að hanna skefti með innfelldum einfæti sem veitir aukastuðning aftan á því. Til þessa hafa menn keypt slíka fætur og sett utan á skeftin en þá þvælast þeir fyrir þegar ekki er verið að nota þá. Síðan er hægt að setja benchrest-forskefti, fest með seglum, framan á.“

Einstök vara

Kristján fór út með tvö skefti á sýninguna og í öðru þeirra var riffill með sjónauka og hljóðdeyfi þannig að gestir gátu áttað sig á hvernig rifflarnir þeirra myndu líta út í Krossdal skefti. Fyrir utan að skeftin auki þægindi er markmiðið að þau gleðji auga skotáhugamannsins.

„Ég smíða þau úr límtré sem ég kaupi frá Finnlandi og set spýtubútana í raun saman úr tveimur kubbum. Framleiðandi timbursins hafði aldrei séð það gert áður þótt hann framleiði fyrir nánast allan Evrópumarkað.“

Viðtökurnar á IWA voru sem fyrr segir jákvæðar. „Það virtust allir kaupa að skeftin okkar væru með einstaka eiginleika,“ segir Kristján.

Stefnir á erlendan markað

Fjöldaframleiðsla skeftanna er hafin og í kjölfarið fara þau að sjást í íslenskum skotveiðiverslunum, meðal annars hjá Veiðiflugunni á Reyðarfirði. Sá markaður getur hins vegar mettast fljótt enda er stefnt á erlendan markað. Þegar er frágenginn samningur við endursöluaðila í Svíþjóð og prufur verða sendar á næstunni til Ítala sem hefur áhuga.

„Svo kom ég heim með heilan spilastokk af nafnspjöldum frá áhugasömum aðilum. Það er ekkert fast í hendi enn en tilfinningin er að eitthvað sé að fara að gerast. Það er óeðlilegt ef ekki leynist eitthvað í spilastokknum,“ segir Kristján.

Hann nefnir sem dæmi að fulltrúar frá stórum þýskum byssusmiðum, eins og Blaser og Anshütz hafi staldrað lengi við á básnum hans, en síðarnefndi framleiðandinn er til dæmis áberandi meðal þeirra sem stunda skíðaskotfimi.

„Ég seldi eitt skefti á sýningunni. Það var þýskur byssusmiður sem kom þrisvar á básinn okkar fyrstu dagana. Í síðasta skiptið kom hann með dóttur sína með sér til að túlka. Hann vildi eignast skeftið sem var á borðinu fyrir framan hann en við megum ekki selja beint yfir borðið á sýningunni.“

Kristján, lengst til vinstri, ásamt Unnari Erlingssyni og Frosta Sigurðarsyni sem sáu um sýningarbás Krossdal á IWA. Mynd: Úr einkasafni


Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar