Heldur hátíð til minningar um systur sína
„Þarna verðum við með bakkelsi og kaffi frá klukkan 15.30 frameftir degi og vonandi endar þetta á góðu partíi í fjósinu gamla í Seldal,“ segir Ína Dagbjörg Gísladóttir, sem skipuleggur Hölluhátíð í dalnum til heiðurs systur sinni Hallgerði Gísladóttur, sagn- og þjóðfræðingi, sem hefði orðið sjötug á þessum tímapunkti hefði henni auðnast líf til.
Hölluhátíðin fer fram þar sem þær systur ólust upp í hinum fallega Seldal en þar stendur eyðibýli með sama nafni þar sem koma skal saman á morgun laugardag. Þangað eru allir velkomnir segir Ína en fjölbreytt dagskrá fer fram í Seldal af þessu tilefni.
„Ég á von á stórum hópi fólks sem þekkti systur mína auk ættingja og vina. Fyrir utan að gefa út ýmsar bækur, og þar á meðal hina merku bók Íslensk matarhefð sem hefur verið uppseld um margra ára skeið, þá gaf hún líka út ljóðabók árið 2004 sem heitir Í ljós. Úr henni ætlum við að lesa og njóta saman en ljóðahópurinn Kvæðakonan góða sem samanstendur af vinkonum Hallgerðar verða með okkur á þessari stund og Baugalínur sömuleiðis. Ég er ekki í vafa að þarna verður glatt og gaman á hjalla og vonandi að aðrir hafi áhuga að deila gleðinni með okkur á morgun.“
Hallgerður Gísladóttir lést árið 2007 en lét eftir sig mikinn menningararf með bókum og skrifum um íslenska matarhefð langt aftur í tímann. Hún var mikil félagsvera, naut söngs og ljóða hvenær sem færi gafst. Hölluhátíðin er henni til heiðurs. Mynd Ína Dagbjört Gísladóttir.
