Írskur listamaður sem hlakkar til að kynnast íslenska myrkrinu
Írski listamaðurinn Rebecca Deegan dvelur um þessar mundir í listamannaíbúð Sköpunarmiðstöðvarinnar á Stöðvarfirði. Deegan tók stefnuna á Ísland í Covid-faraldrinum til að kynnast alvöru einangrun.„Kvöld eitt, þegar samkomutakmarkanirnar voru hvað harðastar, fór ég í sýndarævintýri á Google Maps. Ég smellti á Ísland og týndi mér í fegurð og umfangi landslagsins.
Ísland hefur alltaf heillað mig, en þetta var á tímum þar sem við máttum ekki fara lengra en tvo kílómetra að heiman. Það gerði í útslagið, ég þráði hina sönnu einangrun, myrkrið og töfrana sem Ísland býr yfir,“ er haft eftir Rebeccu í staðarblaðinu Laois Nationalist.
Hún fór strax að leita að listamannaíbúðum og datt fljótlega niður á Sköpunarmiðstöðina sem, auk þess að hafa allt það helsta sem listamann gæti vantað, hafði einnig hundinn Tuma sem Rebecca heillaðist strax af.
Rebecca kveðst hafa sérstakan áhuga á þjóðsögum og hvernig þær varðveitist milli kynslóða. Hún hyggst kynna sér þær íslensku, meðal annars með að ræða við Stöðfirðinga og nota þær sem innblástur í málverk sín.
Rebecca átti upphaflega að koma í mars en vegna ferðatakmarkana frestaðist dvöl hennar þar til nú í nóvember. Afraksturinn af dvölinni verður síðan sýndur á sýningu í Laois á nýju ári.
