Kammerkórinn syngur Messu Schuberts
Kammerkór Egilsstaða, ásamt kammersveit heimafólks undir stjórn Torvalds Gjerde, flytur Messu nr. 4 eftir Franz Schubert í heild sinni á aðventutónleikum á sunnudagskvöld. Kórfélagar hafa að undanförnu þurft að takast á við bæði krefjandi tónverk og Covid-faraldurinn.„Þetta er ótrúlega fallegt verk sem ekki er flutt sérstaklega oft. Það er hins vegar krefjandi. Í fyrsta lagi liggur það mjög hátt fyrir ákveðna söngvara auk þess sem mikill einsöngskafli er í því,“ segir Nanna Imsland, kórfélagi.
Kammerkórinn hefur undanfarin ár haft það fyrir sið að syngja inn aðventuna. Kórinn hefur tekist á við metnaðarfull tónverk, meðal annars Jólaoratoríu Bach og nú er röðin komin að Schubert. Fleiri lög verða þó á dagskránni á sunnudag, fyrir hlé verða sungin aðventu og jólalög.
Upphaflega stóð til að flytja verkið í vor en því var frestað vegna samkomutakmarkana. Þær hafa haft áhrif á æfingar. „Við höfum alltaf æft með bil á milli okkar. Það getur verið snúið því í kór þarf að syngja inn í hljóminn þannig allir hljómi saman og það er flóknara með bil á milli,“ útskýrir Nanna.
Þá þurfa gestir við komu á tónleikana að framvísa neikvæðu hraðprófi. Opið er í sýnatöku á Egilsstöðum klukkan 11:30-12:30 á sunnudag. „Það var annað hvort að gera þessa kröfu eða slaufa verkefninu og það hefði þá verið í annað sinn,“ segir Nanna.
Kórinn telur sextán söngvara en með honum verður sjö manna hljómsveit. Tónleikarnir verða í Egilsstaðakirkju klukkan 17:00.
