Kynna ferðaþjónustu í Fjarðabyggð
Vösk sveit ferðaþjónustufólks úr Fjarðabyggð leggur land undir fót um helgina og heldur til Reykjavíkur til að kynna ferðaþjónustu og það hvað er í boði í sveitarfélaginu yfir vetrartímann. Spilar skíðasvæðið í Oddsskarði þar stórt hlutverk. Nokkrir aðilar sem bjóða upp á gistingu, veitingar og skemmtanir ásamt fulltrúum sveitarfélagsins fara suður og sjá um kynninguna sem verður í Höfuðborgarstofu í Aðalstræti 2, 101 Reykjavík.
Kynningin verður laugardaginn 31. október frá 11:00 – 16:00 og sunnudaginn 1. nóvember frá 11:00 – 14:00 og eru allir velkomnir. Verkefninu, sem ber nafnið „Fjarðabyggð – flott í vetur“ verður svo fylgt eftir með auglýsingum í útvarpi og sjónvarpi og er öllum sem stunda í ferðaþjónustu í Fjarðabyggð boðið að taka átt í þessari sameiginlegu markaðssetningu. Af þessu tilefni gefur Fjarðabyggð út bækling um hátíðir, skemmtanir, veitinga- og gististaði og fleira hagnýtt fyrir ferðamanninn.
,,Þar sem íslenskir skíðamenn leita í minna mæli erlendis teljum við að þetta sé rétti tíminn til að kynna Fjarðabyggð sem spennandi áfangastað í vetur . Stefnt er að því að auka fjölda gesta yfir vetrarmánuðina efla þá þjónustu sem í boði er á svæðinu og stuðla þannig að ferðamennsku allt árið um kring. Það er von þeirra sem standa að verkefninu að fjölgun verði á ferðamönnum á öllu Austurlandi yfir veturinn og að verkefnið skili þjónustuaðilum á svæðinu meiri viðskiptum en ella. Verkefnið er unnið í samvinnu við ferðaþjónustuaðila á svæðinu og er styrkt af Ferðamálastofu og Flugfélagi Íslands.
Fjarðabyggð hefur uppá margt að bjóða fyrir ferðamenn allt árið um kring en yfir vetrartímann er Skíðamiðstöð Austurlands í Oddsskarði eða Austfirsku Alparnir trompið okkar hér fyrir austan. Oddskarðið er talið eitt fjölbreyttasta skíðasvæði landsins. Þar eru þrjár toglyftur og topplyfta sem endar í 840 metrum yfir sjávarmáli. Svæðið státar af ægifögru útsýni og í miklum snjó er jafnvel hægt að renna sér frá toppi fjallsins niður að sjó en það er upplifun sem ekki er hægt að njóta á mörgum stöðum,“ segir í tilkynningu á www.fjardabyggd.is
