Laddi pínu súr en aðrir himinlifandi með Bræðsluhelgina
Bæði gestir og heimamenn á Borgarfirði eystra voru glaðir og reyfir alla Bræðsluhelgina enda fór allt meira og minna vel fram í bænum og á hátíðarsvæðinu sjálfu.
Eins og verið hefur nánast frá upphafi hátíðarinnar var löngu orðið uppselt á tónleikana sjálfa á laugardagskvöldið en þar komu fram afar vinsælir listamenn á borð við Bríeti, Jóa Pé og Króla, Unu Torfa og Maus að ógleymdri goðsögninni Ladda sjálfum. Hann tók allmörg af sínum frægustu lögum og tóku flestir í salnum undir sönginn enda textarnir margir greyptir í huga þeirra sem eldri eru. Heimamennirnir Jón Arngrímsson og Valgeir Skúlason stigu einnig á stokk og þar líka kunnu velflestir í salnum lögin þeirra utanað. Afabarn Jóns, söngkonan Karlotta, kom einnig fram við góðar undirtektir og vitaskuld tók skipuleggjandinn og tónlistarmaðurinn Magni Ásgeirsson, fullan þátt í öllu saman.
Laddi var sjálfur að heimsækja Borgarfjörðinn fyrsta sinni og var yfir sig ánægður með frábærar móttökurnar á svæðinu. Hann gantaðist þó með að hann væri mjög súr með loforð um stórkostlega náttúru allt í kring enda hafi hann varla séð nokkurn hlut meðan hann dvaldi í bænum sökum þokulæðu sem sat yfir nánast alla helgina. Honum leiddist þó ekkert að vitna lundagerið í Hafnarhólmanum.
Að sögn skipuleggjenda gekk allt eins og best varð á kosið enda hátíðin verið haldin það lengi að fátt kemur þeim á óvart. Sama var uppi á teningnum í félagsheimilinu Fjarðarborg á föstudagskvöldinu þar sem einnig var boðið upp á tónlistarveislu og salurinn troðinn allt það kvöld. Lögreglan á svæðinu gaf gestum fína einkunn enda kom ekkert stórvægilegt upp á vaktinni yfir hátíðina.
Magni og Laddi í húrrandi stuði í lokalagi þess síðarnefnda en heill salur af fólki söng með lögum kappans á laugardagskvöldið. Mynd AE
