Maríuerla liggur á eggjum sínum í beinni

Hægt er að fylgjast með maríuerlu, sem gert hefur sig heimakomna í iðnaðarhúsnæði í Fellabæ, liggja á sex eggjum sínum í beinni vefútsendingu.

Maríuerlan er í húsnæði Krossdal Gunstock/PES ehf., „Það hefur komið fyrir að einn og einn fugl slæðist inn á verkstæðið hjá okkur.

Ég hafði heyrt hljóð síðustu tvær vikur en svo sá ég maríuerlurnar koma ofan af timburstafla í eitt skiptið. Þá fór ég að gá betur og sá að parið var byrjað að gera sér hreiður.

Síðan fór ég að skoða málið betur á föstudag. Þá sá ég fullgert hreiður með fjórum eggjum,“ segir Kristján Krossdal.

Kristján, sem er mikill fuglaáhugamaður, tók sig til og setti vefmyndavél upp við hreiðrið. Útsending úr henni er aðgengileg á YouTube. „Ég hef mikinn áhuga á fuglum og hef gaman af að fylgjast með þessu sjálfur. Fyrsta sem strákarnir okkar gera á morgna er að kveikja á sjónvarpinu og kíkja á Maríu,“ segir hann.

Í fyrri nótt bættist fimmta eggið við og síðastliðna nótt það sjötta. Hægt er að fara tólf tíma aftur í tímann í streyminu og má því finna síðasta varpið þegar þetta er ritað.

Maríuerlan liggur á eggjum sínum í 13 daga og svo eru ungarnir aðrar tvær vikur í hreiðrinu. Kristján stefnir því á að halda útsendingunni gangandi meðan fuglarnir eru í hreiðrinu. „Í gær rak reyndar hundurinn okkar nefið í reset-takkann á tölvunni og þá þurftum við að byrja streymið upp á nýtt,“ skýtur hann að.

Hann kveðst aðeins hafa séð kvenfuglinn við hreiðrið síðustu daga en segir hana rólega inni á verkstæðinu. „Hún flýgur stundum upp í gluggann og horfir á mig áður en hún fer aftur á hreiðrið. Hún er ótrúlega skemmtileg.“

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.