Merkri sögu pósthúss á Seyðisfirði að ljúka
Pósthúsið á Seyðisfirði flytur á morgun inn á Landsbankann í bænum. Pósturinn hefur verið til húsa við Hafnargötu 4 og fer nú á númer 2 við sömu götu. Opnunartíminn er 12:30-16 virka daga líkt og í bankanum. Pósturinn segir í tilkynningu að engin breyting verði á þjónustu við viðskiptavini vegna samstarfsins við Landsbankann. Það liggur þó fyrir að opnunartími póstafgreiðslu skerðist frá því sem var. Sama fyrirkomulag er haft á póstþjónustu á Austurlandi á Vopnafirði, Fáskrúðsfirði, Stöðvarfirði og nú Seyðisfirði.
Íbúar Seyðisfjarðar fengu í vikunni bréf inn um lúguna um lokun pósthússins gamla og flutning þjónustunnar inn í Landsbankann. Maður hafði samband við Austurgluggann og kvartaði ákaflega yfir því að nú væri pósthúsið búið að þrengja þjónustu sína og Flytjandi og Landflutningar hefðu lokað starfsstöð sinni í bænum án nokkurs fyrirvara. ,,Mér til gríðarlegrar gremju veit ég ekki hvernig ég get sent pakka út úr bænum né hvernig ég á að fá jólapakkana senda til mín,“ sagði maðurinn, ósáttur við frammistöðu fyrirtækjanna.
-
Mynd/postur.is
