Nicoline frá Teigarhorni gert hátt undir höfði á nýrri sýningu
Nicoline Weywadt frá Teigarhorni í Berufirði, sem fyrst íslenskra kvenna lærði ljósmyndun, er gert hátt undir höfði á nýrri sýningu um konur í hópi frumkvöðla í norrænni ljósmundun sem opnar á Þjóðminjasafni Íslands á laugardag.Á sýningunni sem kallast „Í skugganum“ er sögð saga fyrstu kvennanna sem lögðu stund á ljósmyndun í Danmörku, Færeyjum og á Íslandi.
„Sýningin varpar ljósi á þau sterku áhrif sem konur í ljósmyndun höfðu á þróun listgreinarinnar í Danmörku, Færeyjum og á Íslandi. Þar kemur fram með skýrum hætti að konur í ljósmyndun bjuggu við afar mismunandi aðstæður og möguleika, ekki aðeins í þessum þremur löndum heldur einnig í Ameríku og dönsku Vestur-Indíum.
Þær skrásettu atvinnulíf, frístundir og heimilislíf meðal handverksmanna í Randers og fiskimanna frá Norður-Jótlandi, frumbyggja Norður-Ameríku og bænda á Íslandi, en tóku einnig ljósmyndir úti í náttúrunni og í þéttbýliskjörnunum í sínu nánasta umhverfi.
Fram til þessa hefur verið viðtekin skoðun að fyrstu konurnar sem störfuðu við ljósmyndun hafi einkum tekið portrettmyndir í öruggu umhverfi ljósmyndastúdíósins. Sú var þó alls ekki raunin,“ segir í kynningatexta.
Sýningin er gerð af Austur-Jótlandssafninu, sem leitað hefur fanga víða. Hún var fyrst sett upp í Randers á Jótlandi í apríl í fyrra en hefur síðan farið víða um Danmörku og er nú komin til Íslands.
Einstæð heimild um myndun þéttbýlis á Austurlandi
Hérlendis er sérsýning á verkum Nicoleine. Á sýningunni eru nokkrar ljósmyndir hennar auk teikningar af ljósmyndastúdíóinu sem hún lét byggja á Teigarhorni.
„Nicoline myndaði fyrst og fremst fólk en eftir hana eru einnig útimyndir frá Djúpavogi, Eskifirði og Seyðisfirði sem sýna upphaf þéttbýlismyndunar á þessum stöðum. Safn hennar er einstæð heimild um Austfirðinga og Austurland á seinni hluta 19. aldar,“ segir í kynningu.
Nicoline giftist aldrei en tók að sér systurdóttur sína, Hansínu Björnsdóttur, sem síðar tók líka upp ljósmyndaiðju. Safn Nicoline er varðveitt í Ljósmyndasafni Íslands á Þjóðminjasafni auk ljósmyndabúnaðar hennar svo sem myndavélar, hnakkajárns og baktjalds sem allt er til sýnis á grunnsýningu Þjóðminjasafnsins.
