Opið hús hjá slysavarnardeildum
Fimm austfirskar slysavarnardeildir verða með opið hús annað kvöld. Þær
slást þar í hóp slysavarnardeilda um allt land sem bjóða gestum heim til
að kynna starf sitt.
Innan Slysavarnafélagsins Landsbjargar starfa öflugar slysavarnadeildir sem hafa það að meginmarkmiði að koma í veg fyrir slys ásamt því að styðja við björgunarsveitir á sínu svæði. Starf þessara deilda á sér langa sögu en fyrstu deildirnar voru stofnaðar fyrir um 80 árum og hafa í gegn um tíðina unnið öflugt starf í þágu björgunar og slysavarna.
Öryggi sjómanna hefur alla tíð verið slysavarnadeildum hugleikið enda margar deildanna stofnaðar í þeim tilgangi einum saman að efla sjóslysavarnir. Ekki var vanþörf á því starfi þar sem mest hafa 80 sjómenn látið lífið við Íslandsstrendur á einu ári en með miklu og góðu starfi deildanna og fleiri aðila svo og þróun tækja og búnaðar hefur náðst góður árangur í sjóslysavörnum. Þannig var árið 2008 án mannskaða á sjó og telja fróðir menn að þurfi að leita allt aftur á landsnámsöld til að finna sambærilegt ár.
En starf slysavarnadeilda hefur þróast í áranna rás og fjölmörg ný verkefni litið ljós. Þannig hafa deildirnar sinnt slysavarnaverkefnum sem lúta að öryggisbúnaði barna í bílum, öryggi eldri borgara á heimilum, hafa dreift endurskinsmerkjum til barna, kannað hjálmanotkun barna, skoðað öryggi á heimilum og svona mætti lengi týna til. Í stuttu máli má segja að ekkert viðkomandi slysavörnum sé deildunum óviðkomandi.
Stór þáttur í starfi margra slysavarnadeilda er stuðningur við björgunarsveitir og þannig starfa margar deildir náið með sveitum á sínu svæði bæði við fjáraflanir, sem bakland í útköllum og á margan annan hátt.
Innan slysavarnadeilda starfa margir einstaklingar um allt land og óhætt er að segja að félagsskapurinn sé góður enda má einnig finna í starfi sveitinna dagskrá sem eflir liðsandann auk þess sem félagar deildanna sækja sér fræðslu og þjálfun í ýmsu sem tengist starfinu.
Austfirsku deildirnar fimm sem opna dyr sínar klukkan 20:00 annað kvöld eru:
Slysavarnadeildin Hafrún Eskifirði. Slysavarnahúsinu
Slysavarnadeildin Hafdís Fáskrúðsfirði, inni í Óslandi
Slysavarnadeildin Sjöfn Vopnafirði, í Vogabúð
Slysavarnadeildin Framtíðin Höfn
Slysavarnadeildin Ársól Reyðarfirði, Þórðarbúð
