Plasthrekkur á Djúpavogi
Fréttavefurinn Djúpivogur.is greinir frá því að þann 22. júní hafi orðið undarlegur atburður í bænum. Þegar íbúi nokkur í Borgarlandi ætlaði að setjast inn í bílinn sinn að morgni til sá hann sér til mikillar undrunar að það var búið að pakka bílnum inn í tugi metra af glærri plastfilmu. Myndband af innpökkuninni er nú á Youtube.
Eftir harðvítuga baráttu við plastið með skærum og hnífsbrögðum komst eigandinn inn í bílinn, þá orðinn alltof seinn til vinnu.
Nú spyrja íbúar í Borgarlandinu sig hvaða hrekkjalómur hefur verið á ferð með plastfilmu þessa og sömuleiðis spyrja menn sig hvort hann muni láta til skarar skríða aftur.
Nú hefur hrekkjalómurinn gerst svo djarfur að setja myndband af atburðinum inn á Youtube. Hér má sjá myndbandið á vef Djúpavogs.
Óskar vefurinn jafnframt eftir ábendingum um það hver hrekkjalómurinn dularfulli geti verið.
Mynd/Vefur Djúpavogs.
