Páskafjör í Oddsskarði
Senn líður að hefðbundinni Tíróla-hátíð í Oddsskarði um páska, en hún stendur dagana 9. til 13. apríl. Forsvarsmenn hátíðarinnar segja upplagt að verja góðum dögum í faðmi Austfirsku Alpanna ásamt fjölskyldu og vinum. Margt skemmtilegt verður að vanda á dagskrá Tíróla-hátíðar í ár og er dagskráin hér meðfylgjandi. Mikill snjór er í Oddsskarði og von á góðu færi eins og svo oft er um páskana og að sjálfsögðu verður sól og blíða á svæðinu.
Laugardagurinn 4. apríl
Nesbær
Sýningin Bryggjubrot án skýringa opnar í kaffihúsinu Nesbæ á Norðfirði. Sýndar eru ljósmyndir á striga eftir Sigrúnu Jónsdóttur, sýningin mun standa yfir alla páskana.
Sundlaugar Fjarðabyggðar
Sundlaugarnar á Norðfirði og Eskifirði verða opnar alla páskana 9-13 apríl, frá kl. 12:00 til 19:00.
Fimmtudagurinn 9. apríl. Skírdagur.
Skíðasvæðið Oddskarði
Opið frá 10:00 – 17:00 og um kvöldið frá 20:00 – 23:00.
Dagur brettafólksins. Lögð verður Bordercross-braut (snowboard racing) ásamt stökkum og hólum sem ætti að kæta marga brettaunnendur.
20:00 - 23:00 Um kvöldið verður hið árlega super jump snjóbrettamót, Mótið verður haldið við 1lyftuna ásamt dynjandi tónlist og fjöri. Dæmt verður út frá getu, byltum, stíl og öllu sem dómurum dettur í hug að gefa fyrir.
Hljómsveitin Winson leikur nokkur lög í lok kvöldsins.
Föstudagurinn 10. apríl. Föstudagurinn langi.
Skíðasvæðið Oddsskarði
Opið í frá 10:00 – 17:00.
10:00-12:00 Þrautabraut fyrir yngstu kynslóðina. Lögð verður skemmtileg braut við litlu lyftuna með ýmsum þrautum og stökkum.
Ferðafélag Fjarðamanna
Píslarganga á skíðum. Gengið verður frá Kofanum á Fagradal og um Sléttadal niður að Seljateigi í Reyðarfirði. Þetta er auðveld og falleg skíðagönguleið, hvergi bratt. Fararstjóri Kristinn Þorsteinsson sími 4761381. Þátttakendur mæti við Vegamót Fáskrúðsfjarðarvegar, innan við Reyðarfjörð kl. 10:00 Verð kr. 500.- fyrir fullorðna. www.simnet.is/ffau
Laugardagurinn 11. apríl.
Ferðaþjónustan Mjóeyri
Páskaeggjaleit fyrir alla fjölskylduna á Mjóeyri kl 9:30. Verð er eins og alltaf frjáls framlög.
Skíðasvæðið Oddsskarði
Opið frá 10:00 – 17:00 og um kvöldið frá 20:00 -23:00. Tíróla stemning verður ríkjandi í fjallinu allan daginn.
13:00 Risastórsvig fyrir 16 ára og eldri í minningu Gunnars Ólafssonar. Keppnismenn fyrri ára og aðrir eru hvattir til að skrá sig. Skráning hefst kl.12 í skíðaskála. Við hvetjum aðra gesti til að mæta með bjöllur, flautur og jóðla í takt meðan keppendur bruna hjá.
20:00 til 23:00 Um kvöldið spilar hið heimsfræga Wald 3 ekta Tíróla tónlist um allar brekkur í anda Ómars Skarphéðinssonar fram eftir öllu kvöldi.
Flugeldasýning endar skemmtunina í fjallinu og verður síðan jóðlandi gleði í Hótel Egilsbúð fram eftir nóttu með Wald 3.
Egilsbúð:
Ball með tíróla bandinu Wald 3 í Egilsbúð á Norðfirði.
Valhöll:
Ball í Valhöll á Eskifirði, Ingó og veðurguðirnir.
Sunnudagurinn 12. apríl. Páskadagur.
Ferðafélag Fjarðamanna
Hátíðarganga út í Páskahelli Norðfirði. Verða þetta páskarnir þar sem sólin dansar? Upprifjun á sögnum. Leiðsögumaður: Sigurborg Hákonardóttir. Mæting kl 06:00 við vitann á Bakkabökkum. Verð kr 500.- fyrir fullorðna.
Skíðasvæðið Oddsskarði:
Opið frá kl. 10:00 – 17:00.
Sparifatadagur. Allir að mæta í sínu fínasta pússi í tilefni dagsins.
13:00 Páskaeggjamótið fyrir 8 ára og yngri. Lagðar verða 2 brautir hlið við hlið og eru léttar þrautir í þeim. Gefin verða verðlaun fyrir bestu tilþrif, byltu, brosið og hvað eina sem vekur gleði og fjör. Allir fá síðan páskaegg í lok keppni. Mun hún Rósmunda Halldóra mæta til að dæma og veita verðlaun.
14:30 Bordercross–braut. Leikur fyrir 9 ára og eldri. Tveir eða fleiri renna saman og sá sem kemur fyrstur niður fer aðra umferð. Nota má ýmsa klæki á niðurleið til komast fyrstur niður.
Mánudaginn 13. apríl.
Skíðasvæðið Oddsskarði
Opið frá 10:00 – 17:00.
Kjötsúpukveðjuhátíð. Súpa seld í skálanum í ódýrari kantinum og mun allur ágóði renna til Björgunarsveitarinnar á Norðfirði , en þeir sjá um alla gæslu á svæðinu um helgina.
Allir hvattir til að mæta með góða skapið og skemmta sér vel í góðra vina hópi í fallegu umhverfi og náttúrulega í frábæru veðri sem að sjálfsögðu verður til staðar.
Hægt er að nálgast aðrar upplýsingar á vef Skíðamiðstöðvarinnar www.oddsskard.is. og í síma 878-1474 .
Skíðasvæðið í Oddsskarði er talið með þeim bestu hérlendis
því er tilvalið að verja góðri helgi saman í góðra vina hópi.
Ljósmynd/Oddsskarð
