Sól og gleði á Ormsteiti
Mikil stemmning er nú í miðbæ Egilsstaða í blíðuveðri. Fjöldi fólks skemmtir sér á bæjarhátíðinni Ormsteiti, sem staðið hefur yfir í rúma viku og nær hápunkti í dag á Egilsstöðum og í Fljótsdal á morgun. Í morgun var byrjað að heilgrilla hreindýr yfir opnum eldi í miðbænum og von á í það minnsta 250 manns í hreindýrakjötsveislu þegar líður að kvöldi við menningarhúsið Sláturhúsið. Þar er nú markaður og í kvöld hátíðardagskrá og músík.
Dagurinn var tekinn snemma því Skátafélagið Héraðsbúar leiddi skrúðgöngu úr miðbæ Egilsstaða niður í Egilsstaðavík. Þar grilluðu börn brauðorma á tjágreinum og drukku ormadjús og fullorðna fólkinu var boðið í höfðinglegan morgunverð í yndisfögru umhverfi Gistihússins Egilsstöðum, í boði Gistihússins og Landsbankans.
-
Sigríður Sigmundsdóttir og Þór Ragnarsson bera hitann og þungann af heilgrillun 4 vetra hreindýrskvígu sem boðið verður upp á í hátíðarkvöldverði í miðbæ Egilsstaða í kvöld. Aðrar myndir frá Ormsteiti á Egilsstöðum í dag/SÁ
