Söfnuðu rétt tæplega 50 þúsund krónum fyrir sjúkrahúsið
Alla þriðjudaga í júní og júlí í sumar fara fram tónleikar í bílskúrnum við Valsmýri 5 í Neskaupstað, verkefni sem kallast einfaldlega V-5 bílskúrspartý.
Viðburðirnir eru oftar en ekki vel sóttir af bæjarbúum og sáu þær Sigrún Rósa, Eva Sól og María Dögg tækifæri í tónleikunum.
Síðustu þrjá þriðjudaga hafa þær safnað dóti á tombólu og sett upp afgreiðsluborð við Valsmýri 4, skammt frá bílskúrstónleikunum. Viðbrögð við þessu uppátæki stelpnanna hafa ekki látið á sér standa og hefur salan verið slík að sennilega hefur farið um verslunarmenn landsins.
Verslunarmennirnir þurfa þó ekki að örvænta því stelpurnar hafa látið staðar numið að sinni enda hefur uppskera síðustu þriggja þriðjudaga verið með eindæmum góð. Þær söfnuðu rétt tæplega 50 þúsund krónum og ætla að afhenda Hollvinasamtökum Fjórðungssjúkrahússins í Neskaupstað ágóða sölunnar.
