Sprengja úr El Grillo gerð óvirk

Höfundur: Steinunn Ásmundsdóttir • Skrifað: .

Í dag fannst sprengja í flaki skipsins El Grillo á botni Seyðisfjarðar. Hún fannst þegar kafarar fóru niður að flakinu til að sækja þangað hluta af fallbyssu sem til stendur að gera upp. Menn úr sprengjudeild Landhelgisgæslu Íslands koma væntanlega til Seyðisfjarðar á morgun til að gera sprengjuna óvirka. Nokkur fjöldi sprengja hefur fundist í og við El Grillo gegnum tíðina.

el_grillo_wreck_iceland.jpg

Árni Kópsson kafari er ásamt fleirum við að sækja í flakið síðasta bútinn úr annarri fallbyssu El Grillo, en til stendur að fallbyssan uppgerð verði til sýnis á Seyðisfirði í framtíðinni. Þetta er langt í frá í fyrsta skiptið sem Árni finnur sprengjur í flakinu og alltaf er Landhelgisgæslan látin vita svo unnt sé að koma þeim fyrir kattarnef með öruggum hætti.

Kafarar Landhelgisgæslunnar munu sjá um að sækja sprengjuna og gera hana óvirka á þurru landi.

 

El Grillo var tíu þúsund lesta olíubirgðaskip Bandamanna sem þrjár þýskar flugvélar gerðu sprengjuárás á í síðari heimsstyrjöldinni á Seyðisfirði þann 4. september 1942. Eftir árásina var skipið svo laskað að Bretar ákváðu að sökkva því, þó mikið magn olíu væri enn um borð. Skipið liggur á um 30-40 metra dýpi og er vinsæll áfangastaður sportkafara.

Árið 2004 vann síðan Landhelgisgæslan að því að fjarlægja verulegt magn af skotum og sprengiefni úr flakinu, en á tímabilinu frá 1972-2006 hafa yfir 500 sprengjur verið fjarlægðar úr því.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.

Samþykkja Hafna