Vel sóttur íbúafundur um lokun bæjarskrifstofu
Á vel sóttum íbúafundi sem haldinn var í Neskaupstað á föstudag var bæjarstjórn Fjarðabyggðar afhentur undirskriftalisti þar sem 530 manns mótmæla því að bæjarskrifstofu í Neskaupstað verði lokað um áramót og starfsemi hennar flutt á Reyðarfjörð.
Margir íbúa eru óánægðir með fyrirhugaða breytingu og ætlar hluti starfsfólks á bæjarskrifstofunni að hætta ef starfsemin verður flutt yfir á Reyðarfjörð.
Guðmundur Þorgrímsson, formaður bæjarráðs Fjarðabyggðar, sagði að þrátt fyrir þessa afstöðu um þriðjungs íbúa í Neskaupstað, stæði ákvörðun bæjarráðs. Bæjarbúar fengju áfram óbreytta þjónustu, sem eftirleiðis yrði í bókasafni bæjarins.
Í samstarfsyfirlýsingu Fjarðalista og Framsóknarflokks, sem myndi meirihluta í bæjarstjórn, segi að árið 2012 skuli bæjarskrifstofur í Fjarðabyggð vera komnar undir eitt þak á Reyðarfirði. Það þýði ekki að það eigi ekki að gerast fyrr en 2012.
