Von á tveggja stafa tölum um helgina
Veðurstofan spáir mildu vorveðri um helgina sem verður líklega best á Vopnafirði. Sunnar á svæðinu og út við ströndina verður svalara og líkur á skúrum.Hlýjast á svæðinu í dag verður væntanlega á Vopnafirði þar sem búist er við 12-13 stiga hita eftir hádegið miðað við spá Veðurstofunnar. Um leið hlýnar. Á Héraði gæti hitinn einnig farið yfir 10 stig en við ströndina verður svalara og jafnvel skúrir syðst.
Á morgun er spáð sólskini og aftur meira en tíu stiga hita um stóran hluta svæðisins, aftur verður hlýjast á Vonafirði og Héraði en heldur svalara á fjörðunum, einkum syðst. Þá er von á skúrum þegar líður að kvöldi.
Svipaða sögu virðist vera að segja af veðrinu á sunnudag og mánudag, yfir 10 stig á norðurhluta svæðisins, einkum inn til landsins, en svalara og líkur á skúrum út við ströndina, einkum að sunnanverðu. Von er á rigningu um allt svæðið þegar líða tekur á mánudag.
Af viðburðum helgarinnar má nefna að Hallormsstaðarskóli býður til opins húss milli 13-15 á morgun þar sem nemendur sýna verkefni sín frá vetrinum. Aðalfundur Hinsegin Austurlands verður í fjarfundi kl. 14 á morgun og um kvöldið mætir Jónsi, sem kenndur var við svört föt, á Tehúsið með gítarinn.
Á sunnudagskvöld verður kyrrðar- og gospelstund í Norðfjarðarkirkju þar sem Margrét Perla Kolka Leifsdóttir, tónlistarmeðferðarfræðingur, flytur erindi um áhrif tónlistar á fólk. Í Blábjörgum á Borgarfirði er heilsu- og vellíðunarhelgi sem hefst í dag og lýkur á sunnudag.
Í Skaftfelli á Seyðisfirði opnar á morgun sumarsýningin, The Arctic Creatures Revisited. Hún inniheldur kostulegar ljósmyndir af gönguferðum Stefáns Jónssonar leikara, Óskars Jónassonar leikstjóra og Hrafnkels Sigurðssonar, myndlistarmanns ársins 2023, um Austfirði og Vestfirði.
