Vopnfirðingar skemmtu sér saman í myrkrinu
Vopnfirðingar voru atkvæðamiklir á Dögum myrkurs sem haldnir voru á Austurlandi nýverið og skipulögðu dagskrá sem stóð í heila viku.„Þetta var mjög skemmtilegt. Það er mikilvægt að við skemmtum okkur saman í myrkrinu,“ sagði Fanney Björk Friðriksdóttir, formaður atvinnu- og menningarnefndar Vopnafjarðarhrepps í þættinum Að austan á N4 í gærkvöldi.
Hátíðin hefur verið haldin á Austurlandi í um 20 ár og er í grunninn menningarhátíð en hefur aðeins breytt um svip allra síðustu ár þar sem sótt hefur verið í arf hrekkjavöku. Víða á Vopnafirði voru hús skreytt og fjölbreytt dagskrá í boði.
„Það er tengt við hrekkjavökuna en líka rómantíkina og kertaljósin og aðra stemmingu sem skemmtileg er í myrkrinu.“
