Mikill samdráttur í verslun
Tæplega 17% samdráttur er í dagvöruverslun í mars á föstu verðlagi miðað við sama mánuð í fyrra. Þetta er mesti samdráttur á einu ári, sem mælst hefur frá því að farið var að birta smásöluvísitölu árið 2001.
Allar fréttir
Borgarfjörður í vefsjá
Vefsjá um Borgarfjörð eystri, Víknaslóðir og Loðmundarfjörð er nú opin á veraldarvefnum. Vefsjáin er unnin af Loftmyndum ehf. í Reykjavík og hægt að skoða allan Borgarfjarðarhrepp þar inni með mikilli nákvæmni gegnum vefsíðu Borgarfjarðar eystri.
Styrkur til náms í fiskifræði og skyldum greinum
Landssamband íslenskra útvegsmanna auglýsir styrk til framhaldsnáms í fiskifræði, sjávarvistfræði, sjávarlíffræði, fiskalífeðlisfræði, haffræði, veiðarfærafræði og skyldum greinum. Styrkurinn er ætlaður þeim sem hafa lokið eða eru að ljúka háskólanámi og hyggjast stunda framhaldsnám erlendis á næsta skólaári. Styrkupphæð er kr. 700.000.
Spila sig í tætlur fyrir ferðasjóð
Í menningarmiðstöðinni Sláturhúsinu á Egilsstöðum stendur nú yfir svokallað Páska-Lan. Þarna mætist ungt fólk og spilar tölvuleiki, svo sem DoTa, Counter-Strike, Battlefield 1942, Quake3 og fleira. Páska-Lanið hófst seinni hluta mánudags og því lýkur í dag. Keppnin er fjáröflun til styrktar ferðahópi Menntaskólans á Egilsstöðum. Reikna má fastlega með að strákarnir tuttugu sem skráðu sig til leiks, því engin stúlka var skráð, séu komnir með skjálaga augu og heilabú eftir tveggja daga sleitulaust tölvugláp.
Skinney SF 20 komin heim
Nýtt skip Skinneyjar Þinganess, Skinney SF 20, kom til heimahafnar á Höfn í Hornafirði um hádegisbil. Þegar skipið hefur verið tollafgreitt er öllum boðið að koma um borð að skoða skipið og þyggja léttar veitingar. Reiknað er með að tollskoðun ljúki fljótlega.
Hvar verður tjaldstæðið?
Hugsanlegt er að ekki verði af því að svo stöddu að tjaldsvæði Egilsstaðabæjar verði flutt undir Egilsstaðakoll eins og til stóð, heldur verði fyrrverandi athafnasvæði Barra við Kaupvang tekið undir tjaldstæði. Það svæði er mjög skammt frá núverandi staðsetningu tjaldsvæðis, sem orðið er úr sér gengið og átti að leggja af eftir síðasta sumar. Landið undir núverandi tjaldsvæði hefur verið í eigu Kaupfélags Héraðsbúa. Eiríkur Bj. Björgvinsson, bæjarstjóri Fljótsdalshéraðs, segir málið í vinnslu og verði það rætt í bæjarráði á morgun. Engin ákvörðun liggi fyrir.
Aðalfundur Vísindagarðsins
Nýverið hélt Vísindagarðurinn ehf. aðalfund sinn fyrir starfsárið 2008/2009. Vísindagarðurinn ehf. er hlutafélag í eigu þriggja aðila, ríkissjóðs, Fljótsdalshéraðs og Samstarfsfélags um Vísindagarðinn, sem er félag flestra stoðstofnana og –félaga á Austurlandi.
