Góður árangur Austfirðinga á unglingameistaramóti á skíðum
Austfirðingar eignuðust þrjá verðlaunahafa á unglingameistaramóti 12-15 ára í alpagreinum sem haldið var í Bláfjöllum fyrir páska.
Keppt var í svigi og stórsvigi á fyrri keppnisdegi og í samhliðasvigi þann seinni. Þá voru veitt verðlaun fyrir alpatvíkeppni en úrslit hennar ráðast af samanlögðum árangri í svigi og stórsvigi.
Andri Gunnar Axelsson frá Skíðafélagi Fjarðabyggðar varð Andri Gunnar Axelsson frá Skíðafélagi Fjarðabyggðar varð unglingameistari í stórsvigi drengja 15 ára, í öðru sæti í svigi og annar í alpatvíkeppni.
Jóhanna Lilja Jónsdóttir frá Skíðafélaginu í Stafdal varð unglingameistari í svigi stúlkna 12 ára og önnur í alpatvíkeppni.
Alexandra Ýr Ingvarsdóttir frá Skíðafélagi Fjarðabyggðar varð í þriðja sæti í svigi stúlkna 14 ára og þriðja í alpatvíkeppni.
Iðkendur frá Skíðafélagi Fjarðabyggðar og Skíðafélaginu í Stafdal keppa sameiginlega undir merkjum UÍA í bikarkeppni Skíðasambands Íslands. Alls voru tíu þátttakendur frá UÍA á mótinu.
Næsta verkefni austfirskra skíðakrakka eru Andrésar Andarleikarnir sem haldnir verða í Hlíðarfjalli við Akureyri á morgun. Þangað heldur stór sveit en leikarnir verða settir á morgun.
