Höttur í bikarúrslitum um helgina
Tíundi flokkur Hattar í körfuknattleik karla leikur gegn A liði
Stjörnunnar í bikarúrslitum um helgina. Liðið tryggði sér þar
þátttökurétt um seinustu helgi. Þetta er í fyrsta sinn sem lið frá
félaginu kemst þetta langt.
Höttur vann um seinustu helgi Stjörnuna B 49-34. Eysteinn Bjarni Ævarsson var stigahæstur, skoraði 18 stig og tók átta fráköst en Nökkvi Óskarsson skoraði 12 stig. Áður hafði Höttur slegið út Ármann og Þór/FSU.
Viðar Örn Hafsteinsson, þjálfari liðsins, segir liðið eiga mikið inni fyrir úrslitaleikinn þar sem andstæðingarnir verða A lið Stjörnunnar.
„Undanúrslitaleikurinn var ekki vel spilaður af okkar hálfu en við eigum mikið inni og strákarnir eru staðráðnir í að taka dolluna austur. Við vorum mjög heppnir með drátt í undanúrslitum og eigum góðan séns á sigri íúrslitum þar sem við höfum spilað 2 hnífjafnaleiki við Stjörnuna A í vetur.“
Úrslitaleikurinn fer fram á Ásvöllum í Hafnarfirði á sunnudag klukkan 12:00. Í fyrra lék flokkurinn til úrslita í Íslandsmeistaramótinu en féll úr leik fyrir KR í gríðarlega jöfnum leik.
