Körfubolti: Höttur getur tryggt sig í úrslitakeppnina
Höttur getur komist í úrslitakeppni Íslandsmóts körfuknattleiks karla í fyrsta sinn ef liðið sigrar ÍR á Egilsstöðum í kvöld. Þjálfari liðsins segir alla leikmenn fullkomlega heila heilsu, sem sé sjaldgæft þegar þetta langt er liðið á tímabilið.„Við erum spenntir fyrir leiknum og ætlum að halda áfram að skrifa sögu körfuknattleiksdeildar Hattar,“ segir Viðar Örn Hafsteinsson, þjálfari liðsins.
Hattarliðið hefur þegar náð mikilvægum markmiðum í vetur. Það stærsta náðist fyrir viku þegar liðið tryggði sér áframhaldandi veru í úrvalsdeild karla með sigri á Breiðabliki. Um leið féll ÍR en KR var þegar fallið. Áður hafði liðið komist í undanúrslit bikarkeppninnar.
Viðar segir leikmannahópinn í góðu standi fyrir kvöldið. „Það eru allir leikfærir. Það er sjaldan sem allir eru fullkomlega leikfærir svona seint á tímabilinu.“
Leikurinn hefst klukkan 19:15. Frítt er inn í boði VÍS. „Við vonumst eftir fullu húsi og mikilli stemningu. Síðan er það okkar að standa okkur og fá fólkið með. Vonandi gengur það allt upp.“
