Ætlar að kenna á gítar gegnum Facebook-live
„Það hefur ekki mikið verið gert af þessu hérlendis og mér fannst því spennandi að láta á þetta reyna,“ segir gítarleikarinn Jón Hilmar Kárason, sem er að fara af stað með ókeypis gítarnámskeið gegnum Facebook-síðu sína á mánudagskvöldum.
„Ég hef alltaf verið á leiðinni að setja af stað netnámskeið sem fólk getur keypt og verið með í tölvunni sinni, en segja má að þetta sé partur af því,“ segir Jón Hilmar, en hann ætlar að senda út gítarnámskeiðin út á Facebook-live.
„Hver tími verður á bilinu 30 til 60 mínútur og þar mun ég fara yfir mikilvægustu atriðin fyrir þá sem hafa áhuga á að læra á gítar. Einnig verður hægt spyrja að hverju sem er varðandi gítarinn og ég svara öllu eftir bestu getu. Þáttakendur einnig fá aðgang að forriti sem geymir myndbönd og annað kennsluefni.“
Í auglýsingunni hvetur Jón Hilmar áhugasama til að stíga skrefið. „Ekki horfa til baka og hugsa ég hefði átt að! Nú er tækifærið til að byrja aftur að læra á gítarinn eða að grípa hann í fyrsta skipti.“
Þátttakendur geta mótað námskeiðið
Jón Hilmar segir námskeiðið ekki alveg fullmótað. „Námskeiðið mun taka á sig ýmsar myndir því þátttakendur geta haft áhrif á um hvað er fjallað í hverjum tíma, en þannig getur það öllum, sama á hvaða stað viðkomandi er í spilamennskunni, þó svo að til að byrja með komi ég til með að fjalla mest um byrjandann.
Ég í rauninni veit ekki nákvæmlega hvert þetta fer, hverjir mæta eða hvort einhver mætir. En, sama hvað, þá verð ég á mánudagskvöldum fram á sumar og held þetta komi til með að verða mjög skemmtilegt.“
Ljósmynd: Guðjón Birgir Jóhannsson
