„Algerlega kominn tími á nýja meistara“
Lið Fljótsdalshéraðs mætir liði Reykjavíkur í úrslitaviðureign Útsvars í kvöld, en Fljótsdalshérað sló Fjarðabyggð út í æsispennandi undanúrslitaþætti fyrir hálfum mánuði.
Sem fyrr er lið Fljótsdalshérað skipað kempunum Björgu Björnsdóttur, Hrólfi Eyjólfsyni og Þorsteini Bergsyni.
Þrátt fyrir að aðeins nokkrir tímar séu í viðureigina var Hrólfur sallarólegur þegar Austurfrétt náði tali af honum í morgunsárið.
„Það er mjög skemmtilegt að vera komin svo langt, en mér skilst að þetta sé í fjórða skipti sem liðið er komin í úrslit, þrátt fyrir að hafa aldrei landað titlinum.
Stemmningin innan hópsins er mjög góð, við erum bjartsýn, en pressan er öll á Reykjavík, þau eru taplaus í vetur og ríkjandi meistarar,“ segir Hrólfur, en Reykjavík sigraði Fljótsdalshérað einmitt í fyrstu umferð vetrarins.
Aðspurður hvort spennustigið í salnum hafi ekki verið hátt þegar nágrannasveitarfélögin mættust fyrir tveimur vikum sagði Hrólfur;
„Þetta var gífurlega spennandi, eiginlega algerlega ótrúlegt. Ég er enn í hálfgerðu minnisleysi vegna of mikils flæðis adrenalíns. Ég man varla eftir því hvernig okkur tókst að vinna þetta – ég var nánast alveg búinn að gefast upp í auglýsingahléinu, en þegar ég áttaði mig á því að aðeins 13 stig skildu liðin að réttist úr mér. Þetta hefði átt að vera úrslitaviðureiginin, það hefði verið frábært.
Við komum algerlega tilbúin til leiks og stefnum á sigur, Reykjavík hefur unnið þetta síðastliðin tvö ár og algerlega kominn tími á nýja meistara lið. Ég vil nota tækifærið og þakka öllum stuðninginn í vetur, hann hefur verið ómetanlegur.“
