„Allt í einu á ég verslun á Seyðisfirði“
„Við opnuðum í síðustu viku og viðtökurnar hafa verið ekkert minna en frábærar hingað til,“ segir Guðrún Tinna Thorlacius, sem ásamt fjölskyldu sinni hefur opnað gjafavöruverslunina Steinholt & Co í hinu reisulega og þekkta húsi Steinholti á Seyðisfirði.
Guðrún Tinna er að eigin sögn algjör nýgræðingur hér austanlands en eftir að hafa búið í þéttbýlinu á suðvesturhorninu lunga ævinnar fór hana að langa að komast í nýtt umhverfi úti á landi.
„Ég fór að leita hófanna árið 2019 og aftur 2020 og hafði þá samband við fólk sem ég kannaðist við á Seyðisfirði. Í bæði skipti þurfti ég að hætta við því ekkert húsnæði fannst fyrir mig þá. Svo prófaði ég aftur 2021 og þá sagði Benedikta [Guðrún Svavarsdóttir] mér bara að koma og hér er ég nú og kann frábærlega við mig. Það svo mikið gengið á upp á síðkastið að ég áttaði mig seint á að ég ætti allt í einu verslun hér á Seyðisfirði.“
Verslun Guðrúnar Tinnu er á jarðhæð Steinholts en töluverðar framkvæmdir hafa verið á húsinu undanfarin misseri sem nú er að mestu lokið. Á annarri hæð býr Guðrún og fjölskylda ásamt tveimur hundum og þar eru fleiri íbúðir sem leigðar eru út til skamms tíma. Í risinu er svo stór íbúð sem ætluð er til langtímaleigu.
„Ég er á kafi í sjósundi sjálf og í búðinni er ég að selja búnað til sjósunds en þess utan ýmsar gjafavörur og mig langar mjög að auka úrval af vörum sem fólk hér í grenndinni er að dúlla sér við að framleiða eða hanna. Öllum slíkum aðilum velkomið að hafa samband við mig.“
Guðrún Tinna er velþekkt fyrir mikinn áhuga á Tarot og göldrum og hún getur vel hugsað sér að bjóða upp á námskeið því tengdu þegar fram líða stundir.
„Það kemur sannarlega til greina. Ég kann svo afskaplega vel við mig hér að ég er ekkert á förum neitt og ef áhugi er fyrir hendi skoða ég það að sjálfsögðu.“
Guðrún Tinna í nýrri verslun sinni með barnabarnið Glóbjörtu Lillý í fanginu. Mynd úr einkasafni
