Austfirðingar áberandi í tónleikaferð Krafts
Lífið • This email address is being protected from spambots. You need JavaScript enabled to view it. • Fyrst birt 31. jan 2023 14:41 • Uppfært 31. jan 2023 14:43
Kraftur, stuðningsfélag fyrir ungt fólk sem greinst hefur með krabbamein, stendur nú fyrir tónleikaferð hringinn í kringum landið. Komið verður í Neskaupstað annað kvöld. Austfirðingar eru áberandi í ýmsum stöðum í kringum tónleikaferðina.
„Jú, ég hef haldið tónleika alveg tvisvar í Neskaupstað,“ segir Stefán Magnússon, framkvæmdastjóri Krafts og skipuleggjandi ferðarinnar. Austfirðingar þekkja hann sennilega best sem stofnanda þungarokkshátíðarinnar Eistnaflugs og fyrrverandi íþróttakennara í Nesskóla.
Ekki er annað að heyra á honum en hann hlakki til að koma austur og endurnýja enn á ný kynnin við Egilsbúð. „Þetta er algjörlega stórkostlegt hús, eins og gömlu félagsheimilin eru. Hljómburðurinn í þeim mörgum er meiriháttar. Á Norðfirði höfum við fólk sem þekkir húsið vel og hvernig eigi að láta tónlistina hljóma vel þar.“
Fyrstu tónleikarnir í hringferð Krafts verða á Höfn í Hornafirði í kvöld. Hljómsveit Stebba Jak, þar sem Egilsstaðabúinn Hafþór Valur Guðjónsson er meðal meðlima, fer hringinn en á nokkrum stöðum bætast fleiri atriði við.
Þannig verða Ína Berglind Guðmundsdóttir og Coney Island Babies með á tónleikunum í Egilsbúð annað kvöld. „Það er talað um grósku í tónlistinni eystra. Við fórum að skoða hvað væri að gerast fyrir austan núna. Ína Berglind er ung og efnilega og síðan erum við með heimafólk í Coney Island Babies líka.
Við vorum líka með það opið að Guðmundur R. Gíslason yrði með en hann er ekki heima. Í Neskaupstað hefðum við getað gert risapakka með heimafólki,“ segir Stefán.
Á morgun verða tónleikar á Akureyri. Þar kemur hljómsveitin Dopamine Machine fram en Ívar Andri Klausen, hennar forsprakki, er að austan. Á lokatónleikunum í Reykjavík á laugardag kemur Anya Shaddock frá Fáskrúðsfirði fram og hljómsveitin Langi Seli og skuggarnir en í henni er Jón skuggi frá Norðfirði.
Tónleikaferðin er hluti af árlegu árvekni- og fjáröflunarátaki Krafts undir yfirskriftinni „Lífið er núna.“ Algengara er að tónlistarfólk ferðist um landið á sumrin en Kraftur ákvað að keyra af stað um hávetur.
„Við erum að vekja athygli á starfseminni. Fólk úti á landi greinist með krabbamein, rétt eins og það sem býr í Reykjavík. Vil vildum fara hringinn til að sýna okkur og sjá aðra auk þess að hitta fólkið okkar. Það er gaman að gera meira heldur en vera á samfélagsmiðlunum. Við erum alltaf með varning með okkur, eins og appelsínugulu Kraftshúfurnar sem eru merki átaksins, en við erum líka alltaf til í samtalið og erum til staðar ef einhver vilja tala.“
Ína Berglind Guðmundsdóttir kemur fram í tónleikunum í Egilsbúð á morgun, miðvikudag, klukkan 20:00
