Bílvelta í Hamarsfirði
Bíll valt í Hamarsfirði í gærdag. Fjórir voru í bílnum en slösuðust ekki og þykir það mildi. Sjúkrabifreið kom á vettvang en þegar til kom þurfti einungis einn úr bílveltunni minni háttar aðhlynningu á heilsugæslunni á Djúpavogi, vegna höfuðhöggs. Bíllinn er ónýtur.
Að sögn lögreglu er vegurinn í Hamarsfirði, þar sem bíllinn valt, hættulegur. Þar varð banaslys fyrir nokkrum misserum. Er vegurinn kúptur eftir stórfellda þungaflutninga um hann og að viðbættri hálku eins og var í gær sé vegkaflinn einkar viðsjárverður.
