Fyrirlestur um áhrif loftslagsbreytinga á lífríki sjávar
Einar Sveinbjörnsson, veðurfræðingur hjá Veðurvaktinni, heldur í kvöld opinn fyrirlestur í Neskaupstað um loftlagsbreytingar og áhrif þeirra á ástandið í sjónum.Meðal þess sem Einar mun ræða eru áhrif á hafís, pólsjóinn að norðan, loðnuna, humarinn, síldina og makrílinn úr suðaustri.
Þrjú skip leita nú að loðnu norður af Hornströndum. Engin loðna veiddist í fyrra, í fyrsta skipti frá árinu 1963 í íslenskri lögsögu og mælingar ársins gefa ekki góð fyrirheit. Sérfræðingar segja loftslagsbreytingar meðal þess sem áhrif hafa á loðnuna og hafa kallað eftir nánari rannsóknum.
Þá var humarvertíðin í fyrra með lakara móti. Hins vegar hefur makríll undanfarinn ár leitað inn í íslenska lögsögu með hlýrri sjó.
Fyrirlesturinn hefst klukkan 19:30 í Safnahúsinu í Neskaupstað. Hann er öllum opinn og aðgangur ókeypis.
